ەگىس باسىندا ەڭبەك ەتەر مامان جوق

397
0
بولىسۋ:

ماجىلىس دەپۋتاتتارى, «نۇر وتان» فراكتسيياسىنىڭ مۇشەلەرى جاميلا نۇر­مان­بەتوۆا, ايگۇل نۇركينا جانە ايزادا قۇرمانوۆا اقمولا وبلىسىنا جۇمىس ساپارى بارىسىندا شور­تان­دى اۋدا­نىنداعى ا.باراەۆ اتىنداعى استىق شارۋاشى­لى­عى عىلىمي-وندىرىستىك ورتالىعىنىڭ جۇمىسىمەن تانىسىپ, ورتالىقتاعى جاستارمەن كەزدەستى.
شورتاندى اۋدانىنداعى مەك­تەپتەردىڭ جوعارى سىنىپ وقۋشى­لارى قاتىسقان شارادا كاسىپتىك باع­دار بەرۋ ماسەلەلەرى تالقى­لان­دى.
كەزدەسۋ بارىسىندا جاميلا نۇرمانبەتوۆا ەلباسىنىڭ جاس­تار جىلى شەڭبەرىندە تاعايىن­دالعان باستامالارىن ىسكە اسىرۋ­داعى جاستاردىڭ رولىن اتاپ وتتى.
– بىز ورتالىقتاعى جاس عا­لىم­دار مەن قىزمەتكەرلەرگە كوپ كو­ڭىل بولەمىز. ولارعا ۇمىت ارتىپ, زەرت­حانا مەڭگەرۋشىسى سيياقتى قىز­مەتتەرگە تاعايىنداپ كەلە­مىز. قا­زىر جاس عالىمدارىمىز يزرايل, دانييا جانە الىس-جا­قىن شەت ەلدەردە بىلىمىن جەتىل­دى­رىپ, كاسىبيلىگىن شىڭداپ جاتىر, – دەدى ا.باراەۆ اتىنداعى استىق شا­رۋاشىلىعى عىلىمي-وندى­رىس­تىك ورتالىعىنىڭ باس ديرەكتورى كەنجە ابدۋللاەۆ.
ا.باراەۆ اتىنداعى استىق شا­رۋاشىلىعى عىلىمي-وندىرىستىك ور­تالىعىندا جىل سايىن اۋىل شا­رۋاشىلىعىنىڭ 90 مىڭ ۇلگىسى زەرتتەلىپ, 2 مىڭعا جۋىق بۋدانداس­تىرۋ كومبيناتسييالارى جۇزەگە اسادى. قازىر مۇندا جاس عالىم­دار­دى تارتۋ بويىنشا جۇيەلى جۇمىس جۇرگىزىلىپ جاتىر. ماسەلەن, ورتا­لىققا 30-عا جۋىق مامان قاجەت بولسا, باسىم كوپشىلىگىنە جاس­تاردى تارتۋ جوسپارلانعان.
كەزدەسۋدە اۋداندىق جاستار رەسۋرسى ورتالىعىنىڭ جۇمىسى مەن پوليگوندى باسقارۋ ورتا­لىعىنىڭ جۇمىسى تالقىلاندى. جيىن سوڭىندا سەلەكتسييالىق جە­تىستىك اۆتورلارى اقشالاي سەرتي­فيكاتتارمەن ماراپاتتالدى.
ماجىلىس دەپۋتاتتارى شىعىس قازاقستاننىڭ ۇلان اۋدانىنداعى ساراتوۆ اۋىلىندا دا ىسساپارمەن بولىپ, اۋىل تۇرعىندارىمەن كەزدەستى.
حالىق قالاۋلىلارىنىڭ شى­عىس قازاقستانعا ساپارى قاڭ­تار­دىڭ 31-ى كۇنى باستالعان بولاتىن. «نۇر وتان» پارتيياسى فراكتسييا­سى­نىڭ مۇشەلەرى نۇرتاي سابيليا­نوۆ, امانجان جامالوۆ, يۆان كليمەنكو, ميحايل چيركوۆ, مۇ­رات تەمىرجانوۆ جانە سەرگەي زۆولسكيي اياگوز, ۇرجار, كاتون-قاراعاي, گلۋبوكوە, شەمونايحا, بورودۋليحا, كوكپەكتى اۋداندارى مەن سەمەي, ريددەر جانە وسكەمەن قالالارىن ارالاپ, تۇرعىندارمەن جولىقتى.
ساراتوۆ ەلدىمەكەنىندە وتكەن كەزدەسۋگە جۇزدەن اسا ادام جي­نال­دى. باسقوسۋ كەزىندە سايلاۋشىلار اۋىل شارۋاشىلىعىن, اگرووندىرىس كەشەنىن دامىتۋ, حالىقتى الەۋ­مەت­تىك قورعاۋ, دەنساۋلىق ساقتاۋ سا­لاسىنا قاتىستى تولعاندىرعان سۇراقتارىن جولدادى. ماسەلەن, اۋىل اقساقالدارى كەڭەسىنىڭ تورا­عاسى زەينەتاقىنىڭ وسۋىنە قولداۋ كورسەتكەن ەلباسىنا ال­عى­سىن ايتا كەلە, اۋىلدى جەرلەردەگى ەڭ­بەك­ا­قى­نىڭ ەلدەگى ورتا ەسەپكە ساي ەمە­سىن, ستاتيستيكانى دەڭ­گەي­لەپ جۇر­گىزۋدى ۇسىندى. سەبەبى, اۋىلدا ەڭ­بەك ەتەتىن جاستار قالعان جوق دەدى.
– قازىر شارۋا­شى­لىقتا ەڭبەك ەتەتىن ماماندار جوقتىڭ قاسى. ەگىستىكتە ەڭبەك ەتەتىن, كومباين مەن تراكتور جۇرگىزەتىن ناعىز مامان از. وسى رەتتە شىعىس قازاقستان اۋىل شارۋاشىلىعى سالاسىندا ەڭبەك ەتەتىن ازاماتتار اتىنان وننان اسا ۇسىنىس پەن وتىنىش حات الدىم, – دەدى ماجىلىس دەپۋتاتى مۇرات تەمىرجانوۆ.
دەپۋتاتتتار وڭىردەگى وندى­رىس­تىڭ الەۋەتى مەن دەنساۋلىق ساقتاۋ جانە بىلىم سالاسىنداعى جوعارى جەتىستىكتەردى ەرەكشە اتاپ وتتى. امانجان جامالوۆتىڭ ايتۋىنشا, روبوتتاندىرىلعان حيرۋرگييا ­ور­تالىعىن اشقان شىعىس قازاق­ستان – بولاشاققا ۇلكەن سەرپىن جاساپ وتىرعان بىردەن-بىر ايماق.
– مۇنداعى «انا مەن بالا» ورتالىعىن كورىپ, تاڭعالدىم. مۇن­داي جوعارى دارەجەدەگى ەمدەۋ مەكەمەلەرى تەك استانادا دەپ وي­لاعانمىن. ورتالىق الەمدە بار سوڭعى ۇلگىدەگى قۇرال-جابدىق­تار­مەن قامتىلعان. سونداي-اق وبلىس ورتالىعىندا تمد ەلدەرىندەگى كەز كەلگەن قيىندىقتاعى وتا جاساۋعا قابىلەتتى روبوت تۇر, – دەدى امان­جان جامالوۆ.
ماجىلىس دەپۋتاتى نۇرتاي سا­بي­ليانوۆ تا اباي اۋدانى حالقىمەن كەزدەسۋ وتكىزىپ, بىرقاتار الەۋ­مەت­تىك ماڭىزدى نىسانداردى ارا­لادى.

ابىلايحان جۇماش

بولىسۋ: