Егіс басында еңбек етер маман жоқ

Мәжіліс депутаттары, «Нұр Отан» фракциясының мүшелері Жәмилә Нұр­ман­бетова, Айгүл Нұркина және Айзада Құрманова Ақмола облысына жұмыс сапары барысында Шор­тан­ды ауда­нындағы А.Бараев атындағы астық шаруашы­лы­ғы ғылыми-өндірістік орталығының жұмысымен танысып, орталықтағы жастармен кездесті.
Шортанды ауданындағы мек­тептердің жоғары сынып оқушы­лары қатысқан шарада кәсіптік бағ­дар беру мәселелері талқы­лан­ды.
Кездесу барысында Жәмила Нұрманбетова Елбасының Жас­тар жылы шеңберінде тағайын­далған бастамаларын іске асыру­дағы жастардың рөлін атап өтті.
– Біз орталықтағы жас ға­лым­дар мен қызметкерлерге көп кө­ңіл бөлеміз. Оларға үміт артып, зерт­хана меңгерушісі сияқты қыз­меттерге тағайындап келе­міз. Қа­зір жас ғалымдарымыз Израиль, Дания және алыс-жа­қын шет елдерде білімін жетіл­ді­ріп, кәсібилігін шыңдап жатыр, – деді А.Бараев атындағы астық ша­руашылығы ғылыми-өнді­ріс­тік орталығының бас директоры Кенже Абдуллаев.
А.Бараев атындағы астық ша­руашылығы ғылыми-өндірістік ор­талығында жыл сайын ауыл ша­руашылығының 90 мың үлгісі зерттеліп, 2 мыңға жуық будандас­тыру комбинациялары жүзеге асады. Қазір мұнда жас ғалым­дар­ды тарту бойынша жүйелі жұмыс жүргізіліп жатыр. Мәселен, орта­лыққа 30-ға жуық маман қажет болса, басым көпшілігіне жас­тарды тарту жоспарланған.
Кездесуде аудандық жастар ресурсы орталығының жұмысы мен Полигонды басқару орта­лығының жұмысы талқыланды. Жиын соңында селекциялық же­тістік авторлары ақшалай серти­фикаттармен марапатталды.
Мәжіліс депутаттары Шығыс Қазақстанның Ұлан ауданындағы Саратов ауылында да іссапармен болып, ауыл тұрғындарымен кездесті.
Халық қалаулыларының Шы­ғыс Қазақстанға сапары қаң­тар­дың 31-і күні басталған болатын. «Нұр Отан» партиясы фракция­сы­ның мүшелері Нұртай Сәбиля­нов, Аманжан Жамалов, Иван Клименко, Михаил Чирков, Мұ­рат Теміржанов және Сергей Звольский Аягөз, Үржар, Катон-Қарағай, Глубокое, Шемонаиха, Бородулиха, Көкпекті аудандары мен Семей, Риддер және Өскемен қалаларын аралап, тұрғындармен жолықты.
Саратов елдімекенінде өткен кездесуге жүзден аса адам жи­нал­ды. Басқосу кезінде сайлаушылар ауыл шаруашылығын, агроөндіріс кешенін дамыту, халықты әлеу­мет­тік қорғау, денсаулық сақтау са­ласына қатысты толғандырған сұрақтарын жолдады. Мәселен, ауыл ақсақалдары кеңесінің төра­ғасы зейнетақының өсуіне қолдау көрсеткен Елбасына ал­ғы­сын айта келе, ауылды жерлердегі ең­бек­а­қы­ның елдегі орта есепке сай еме­сін, статистиканы дең­гей­леп жүр­гізуді ұсынды. Себебі, ауылда ең­бек ететін жастар қалған жоқ деді.
– Қазір шаруа­шы­лықта еңбек ететін мамандар жоқтың қасы. Егістікте еңбек ететін, комбайн мен трактор жүргізетін нағыз маман аз. Осы ретте Шығыс Қазақстан ауыл шаруашылығы саласында еңбек ететін азаматтар атынан оннан аса ұсыныс пен өтініш хат алдым, – деді Мәжіліс депутаты Мұрат Теміржанов.
Депутатттар өңірдегі өнді­ріс­тің әлеуеті мен денсаулық сақтау және білім саласындағы жоғары жетістіктерді ерекше атап өтті. Аманжан Жамаловтың айтуынша, Роботтандырылған хирургия ­ор­талығын ашқан Шығыс Қазақ­стан – болашаққа үлкен серпін жасап отырған бірден-бір аймақ.
– Мұндағы «Ана мен бала» орталығын көріп, таңғалдым. Мұн­дай жоғары дәрежедегі емдеу мекемелері тек Астанада деп ой­лағанмын. Орталық әлемде бар соңғы үлгідегі құрал-жабдық­тар­мен қамтылған. Сондай-ақ облыс орталығында ТМД елдеріндегі кез келген қиындықтағы ота жасауға қабілетті робот тұр, – деді Аман­жан Жамалов.
Мәжіліс депутаты Нұртай Сә­би­лянов та Абай ауданы халқымен кездесу өткізіп, бірқатар әлеу­мет­тік маңызды нысандарды ара­лады.

Абылайхан ЖҰМАШ