Өрттен сақтану мұржа тазалаудан басталды

«Нұр Отан» партиясы­ның Павлодар облысы Ақсу қалалық филиалын­да өрт қауіпсіздігі шара­ла­рын талқылаған жиын өтті. Қала әкімі Төтенше жағдайлар және құқық қорғау қызметкерлерімен өткізген жиында бірқатар мәселелерді талқылады.

Соңғы кездері өрттің кесірінен орын алған төтенше жағдай­лар­дың соңы қайғылы аяқталды. Аяз күшейген кезде тәулік бойы үздік­сіз пеш жағатын тұрғындар үшін қауіп әлі де бар. Аймақ басшысы Балғабай Ыбыраев тұрғындарға ең бірінші өрт қауіпсіздігін есте ұстау керегін қатаң ескертті.
– Бұған дейін өрттен болған жағдайлар қайталанбас үшін қауіпсіздік шараларын қатаң түр­де күшейту қажет. Ең алдымен, ие­сіз, қаңырап тұрған бос нысан­дар­ды назарда ұстаған жөн. Жал­ғызбасты адамдардың үйлерін аралап, олардың жағдайымен танысыңдар. Барлық пәтерлерді мұқият қарап, есепке алыңдар. Сонымен қатар шаруашылық нысандарындағы электр желісін дұрыс жүргізу талаптарын тексеру керек, – деді Балғабай Ыбыраев.
Ақсу қалалық төтенше жағ­дай­лар бөлімінің мәліметінше, биыл жылыту маусымында 6 723 же­ке және көппәтерлі үй­лерді аралап, 11 215 адамға өрт қа­уіп­сіз­дігі шаралары түсін­ді­ріл­ген. Осы жыл басталысымен Ақсуда 8 өрт оқиғасы тіркелген. Өрт сал­дарынан бір адам зардап шегіп, біреуі көз жұмған.
«Улы газ» акциясы аясында төтенше жағдай бөлімі жергілікті атқарушы органдармен алдын алу жұмыстары жүргізіліп жатыр. Нақты айтқанда, жылыту пеште­рінің мұржасын тазалауға көмек­тес­ті. Ауылдық округтерде барлы­ғы 120 тұрғын үй қамтылды. Со­ны­мен қатар ауылшаруашылық ны­сандар да тексерілді. Кейбір шаруа қожалықтары улы газ сиг­на­лизаторларын орнатып жатыр.
Әлеуметтік желінің мүмкіндігі зор. Сол үшін де пайдалы ақпарат­тарды жиі салып, халықты маңыз­ды мағлұматтармен құлақтандыру, бейнероликтер түсіріп, көпші­лікке таратылғаны дұрыс.
Өрт қауіпсіздігін қамтамасыз ету мақсатында Ақсу қаласының Төтенше жағдайлар бөлімінің ма­мандары, зейнеткер, мүмкіндігі шек­теулі жандар және көпбалалы, аз қамтылған отбасыларға кө­мек­тесті. Оларға улы газ сигнализа­то­рын орнату, жеке үйлердің жы­лыту пешінің мұржасын таза­лау үздіксіз жалғасады. Жергілікті полиция қыз­мет­керлері елді ара­лап, өрттің алдын алуға көмектеседі.