Үздік тауарлар анықталды
Ал 3 күнге созылған «Қазақстанның үздік тауары-2022» өңірлік байқау-көрмесінде өңірімізде өндірілген сан алуан тауар жұртшылыққа ұсынылды. Шымкент қаласының кәсіпкерлер палатасы мен қала әкімдігінің ұйымдастыруымен табиғат аясында орталық саябақта өткізілген бұл жолғы көрменің бәсі де бөлек болды. Мұнда қаланың азық-түлік, фармацевтика, машина жасау, химия, жеңіл өнеркәсіп, агроөнеркәсіп кешені мен құрылыс индустриясының 70-тен астам тауар өндірушісі өз экспозицияларын орналастырды. Олардың қатарында биыл алғаш рет қатысып отырған кәсіпкерлер жаңа жобаларымен, яғни жаңа өніммен байқауда бақ сынады. Декоративтік тастар өндіретін «Бесқұдық тас» ЖШС, дезинфекциялаушы және жуғыш заттар шығаратын Topseller of chemical products ЖШС, металл құрылымын ала келген Qut-Bereke Qurylys ЖШС және Quraq group ЖШС (трансформер жиһазы), Alem Luxury ЖШС (жиһаз), «БАРАКА» ЖК (сүт өнімдері), NURTAU distribution company ЖШС (сұлы шоколад кәмпиттері мен сағыз өндірісі), «Петухова» ЖК (бөлмеаралық есіктер) көздің жауын алар, заман талабына жауап беретін өнімдерін ұсынған. Үздік сапа иесін анықтау мақсатында ұйымдастырылған шараға қала әкімі М.Әйтенов, мәслихат депутаттары, кәсіпкерлер келіп, барлық павильонды аралап көрді. Жергілікті тауар өндірушілердің өнімдерімен танысты. Шымкент қаласының Кәсіпкерлік және индустриaлды-инновациялық даму басқармасың басшысы Береке Дүйсебеков байқауға үшінші мегаполистегі 700-ден аса өндіріс орнының таңдаулы 80-ге жуық кәсіпкерлік нысаны қатысып отырғанын жеткізді. «Шымкент қаласының өндіріс орындары жағынан әлеуеті өте жоғары. Елімізде фармацевтика саласы бойынша біздің қаламыз алдыңғы қатардан көрініп отыр. Себебі шымкенттік фармацевтикалық кәсіпорындар пандемия кезінде еліміздің біраз аумағын керекті медициналық құралдармен, қорғаныс заттарымен қамтып отырды. Одан бөлек, құрылыс материалдары, жеңіл және тамақ өндірісі де алдыңғы қатардан көрінеді. Бұл тұрғыдан тауарларымыз тіпті көрші мемлекеттерге шығарылып жатыр. Кәсіпкерлеріміз мемлекеттің қолдауын сезіне отырып, жаңа идеяларды жүзеге асырып жатыр. Мемлекет басшысы алдағы 5 жылдыққа ұлттық бағдарламаны бекітті. Оның бірі – сыртқы шикізатқа тәуелділікті азайту. Біз қазір терең өңдеу саласына басымдық бердік. Күнделікті тұтынатын заттарды өзімізден шығаруды қолға алып жатырмыз, бұл жұмыс күшін көбейтіп, халықтың әл-ауқатын арттыруға септігін тигізетіні сөзсіз», – деп атап өтті басқарма басшысы. Кәсіпкерлер палатасы Өңірлік кеңесінің төрағасы Қайрат Молдасейітов көрмеге қатысушыларға сәттілік тіледі. Оларға шымкенттіктердің еңбекқор екенін, Қазақстан бизнесінің 50 пайызын көтеріп жүргенін айтып шабыт берді. Үздік тауарлар байқауында «Атамекен» кәсіпкерлер палатасы жанынан құрылған арнайы сараптамалық комиссия үш номинация бойынша конкурс дипломанттарын таңдады. Олардың қатарында «Халық тұтынатын үздік тауарлар» номинациясын сұлы шоколад кәмпиттері мен сағыз шығаратын NURTAU distribution company ЖШС, ойыншық өнімдерімен танымал «Байтемирова Р.С» және «Бал Декор» компаниясы жеңіп алды. Ал, «Өндірістік мақсаттағы үздік тауарлар» номинациясын металл құрылымын өндіретін Qut-Bereke Qurylys ЖШС, «Қаз Мед Пром» және Mega Smart жауапкершілігі шектеулі серіктестіктері еншіледі. «Үздік азық-түлік тауарлары» бойынша «Рахат-Шымкент» ЖШС, Phyto-apipharm және Nefis group компаниялары жеңімпаз болып танылды. Енді аталған үздіктер жыл соңында Нұр-Сұлтан қаласында өтетін «Қазақстанның үздік тауары-2022» республикалық байқауына жолдама алды. Шәмшіге құрмет көрсетілген күн Қала күнінің тағы бір ерекше шарасы – «Шымкенттің шырайы – Шәмші» атауымен өткізілген композитор Шәмші Қалдаяқовтың құрметіне орай өткен концерт. Шығармашылық концерт Шәмші аллеясында өтті. Мерекелік шараға қатысқан қала әкімі М.Әйтенов жиналғандарды атаулы мерекемен құттықтап, Шымкент қаласының әлеуметтік-экономикалық, қоғамдық дамуына зор үлес қосып жүрген 10 азаматқа «Шымкент қаласының құрметті азаматы» атағын табыстады. – Қала күні – қала халқы үшін ерекше мереке. Шымкент қаласының тұрғындары мен қонақтарына арналған түрлі іс-шара бір апта бойы өтіп жатыр. Солардың ішінде айрықша атап өтетін салтанатты концерт ұлтымыздың ұлы композиторы Шәмші Қалдаяқовтың рухына бағышталады. Президент Қасым-Жомарт Тоқаев «Қазақ халқының музыка өнерін дамытудағы айрықша еңбегі үшін композитор Шәмші Қалдаяқовқа жоғары дәрежелі ерекшелік белгісі – «Қазақстанның Еңбек Ері» атағын беру туралы Жарлыққа қол қойды. Халқымыздың ұлы тұлғасына, қазақ музыкасына көрсетілген құрметпен баршаңызды құттықтап қоюға рұқсат етіңіздер! Халқымыздың бағына туған Шәмші ағамызға арналған концерт аясында, қала күні қарсаңында бүгін біз дәстүр бойынша «Шымкент қаласының құрметті азаматы» мәртебесін салтанатты түрде марапаттағалы отырмыз. 4 жыл бұрынғы тарихи шешім өзінің өміршеңдігін көрсетті. 4 жылда қаламызда тұрғындар саны 12 пайызға, өнеркәсіп өнімінің көлемі 60 пайызға, қала бюджеті 3,9 есеге артты. Барша жетістік тұрғындардың белсенділігі мен қолдауының арқасында болып отыр. Шәмшінің әуезді әндері әрбір үйдің қуанышында шырқалсын! – деп тілек білдірді қала басшысы Мұрат Әйтенов. Мерекелік концертте Шымкент қалалық эстрадалық-симфониялық оркестрінің сүйемелдеуімен вальс падишасының әндері шырқалды. Шығармашылық кеште елімізге еңбек сіңірген әншілер – Роза Рымбаева, Майра Мұхамедқызы, Нұрғали Нүсіпжанов, Медеу Арынбаев, Уралхан Сейілбекова, Нұржамал Үсенбаева, Жұбаныш Жексенұлы, Бауыржан Исаев сияқты өнерпаздар өнер көрсетті. Қала күні одан ары Арбат демалыс алаңында «Балмұздақ фест» шарасымен, Әл-Фараби алаңында «Шарықтай бер, Шымқалам» атты мерекелік гала-концертпен жалғасты. Гала-концертте еліміздегі барша қазақ эстрадасының жарық жұлдыздары өнер көрсетті. Айта кетейік, биыл Шымкентте қала күні үшінші рет тойланып отыр. 2 200 жылдық тарихы бар көне қала осыдан 4 жыл алдын мегаполис статусын алды.Шымкент қаласы