Театрдың әдебиет бөлімінің меңгеруші Шынар Омарова мәселе әлеуметтік желіде жарияланғандай емес, мүлдем басқаша екенін айтып өтті. Түркістан музыкалық драма театры 18-19 маусым күндеріне «Гамлет», «Қарагөз», «Фауст» триптих премьерасын қойғалы жатқан. Триптих үшін көрермендерге билет те сатылып қойған. Алайда техникалық ақаулықтарға байланысты аталған премьера қазан айына шегеріліпті. «Триптихқа дайындық кезінде сахнаның көтеріліп түсетін, яғни оркестр шұңқыры істен шықты. Біз дереу арнайы мамандардан құрылған комиссия құрып, сахнаның алдыңғы бетін ауыстырғанша, премьераны тоқтату туралы шешім қабылдадық. Триптих: «Гамлет», «Қарагөз», «Фауст» премьерасында пайдаланатын декорациялардың салмағы сәйкес келмеуіне байланысты дайындықты тоқтатып, премьераны күзге шегеруге тура келді. Себебі режиссер шешіміне сәйкес көп пайдаланылатын декорациялар орналасқан жер оркестр шұңқырының маңайы болып табылады. Яғни, сахнада пайдаланылатын құлайтын көлемі үлкен қабырғалар мен аквариум конструкциясының салмағы сумен бірге 2 тоннаны құрайды», – дейді Шынар Омарова.Ал театр сахнасында оркестр шұңқырынан бөлек тұста спектакльдерді қоюға жарамды екен. Сондықтан «Бөрте» спектаклі қойылымына кедергі жоқ.
Дегенмен пайдалануға берілгеніне бар-жоғы 1 жыл енді толған, қыруар қаржымен салынған ғимараттағы ақаулық көптің көңілін күпті еткені рас. Мұндағы кінә театр ұжымында емес, құрылыста. Музыкалық драма театрдың бас суретшісі Дәурен Құрманғазыұлы ақаулықты көрген сәттен құрылысты жүргізген компанияға жедел хабар бергенін айтады. «Бұл жағдай триптихқа дайындық кезінде болды. Техникалық монтаж болып жатқанда, оркестрлік шұңқыр көтеріліп төмен түсуі тиіс болатын. Алайда ол көтерілген күйі төмен түспей қалды. Цифрлы басқарылатын тетікте ақау болғанын байқатты. Дереу астына түсіп қарағанымызда 4 тағанның бірі сынып кеткенін көрдік. Құрылысын жүргізген компанияның 3 жылға дейін кепілдігі болады. BI Group компаниясына хабарласқанымызда, олардан мамандар келіп, мұнда жоғары салмақ түспеуі керек екенін айтып, хат беріп кетті. Триптих қоятын режиссерлер 2 тонна болатын аквариум кіретінін айтқан соң біз қауіптене бастадық. Қанша дегенмен үлкен салмақ, оның үстіне адам жүрсе ары-бері тартысқан соң одан сайын салмақ қосылады. Сөйтіп, триптих қоюға рұқсат бермедік. Енді BI Group компаниясы тарапынан осынау оркестрлік шұңқырды алған Еуропаға хат жолданған. Мұның қай уақытта қалпына келетіні белгісіз», – дейді бас суретші.Ал BI Group компаниясының баспасөз қызметі оркестр шұңқырындағы төрт көтеру механизмінің бірі істен шыққанын растады. «Қауіпсіздік мақсатында уақытша тіректер орнатылып, жұмыс аяқталғанша электр қуаты өшірілді. Қауіпті аймақ қоршауға алынды. Қазіргі уақытта өндіруші Serapid (Франция) компаниясына сұраныс жіберілді. Түсіріп-көтеру механизмінің бұзылу себептерін анықтау үшін техникалық тексеру жүргізілуде. Себебі анықталған соң зауыт ауыстыруға қажетті материалдар мен құрамдас бөлшектердің тізімін ұсынады. Айта кетейік, көлемі 43,8 шаршы метрлік оркестрлік шұңқыр статикалық жағдайда 20 тоннаға дейін, ал динамикалық қозғалыс кезінде 11 тоннаға дейін төтеп бере алады» делінген ресми жауапта. Одан бөлек, 2019 жылдың тамызы мен 2021 жылдың наурызы аралығында салынған Түркістан драма театрының кепілдік мерзімі пайдалануға беру актісінен кейін 3 жылды құрайтыны айтылған. Бұзылу себебіне қарамастан, компания оркестрлік шұңқыр тетіктерінің жұмысын қалпына келтіру үшін қажетті қосалқы бөлшектерді ауыстыру бойынша міндеттемелерді өзіне алады. Абырой болғанда, көтеру механизмінің бірі қойылымға дайындық кезінде сынған. Алда-жалда премьера үстінде болса, біраз адамның өміріне қауіп төнер еді. Қалай болғанда да, мұндай дүниелердің сапалы салынғаны жөн. Әйтпесе, бір жыл болмай жатып сахнаның сыр беруі жақсы емес. Түркістан облысының құрылыс басқармасы әзірге тым-тырыс. Бірнеше мәрте хабарласып, жауап ала алмадық. Әзірге құрылысын жүргізген компания мен нысанның иелері ғана өзара келісіп жұмыс істеп отыр. Алайда әу баста басы-қасында болған жауапты мекеменің мұнымен бас ауыртуға мұршасы болмай тұр.
Түркістан облысы