Бүгінде кәсіптің тың түрін дөңгелеткендер аз емес. Олардың бірі – құтыны «түтіп», мақта өндіріп жатса, енді бірі – «Eva төсеніштер» жасайды. Көлік жүргізушілері арасында кең сұранысқа ие Eva (сэвилен) материалынан жасалатын төсеніштер экологиялық таза және жағымсыз иісі болмайды. Сол себепті оны сатып алушылардың қарасы қалың. Міне, осындай кәсіп түрін Жамбыл облысы Қордай ауданының тумасы Шарапат Дауылбаев қолға алып, табысқа кенеліп отыр. Жас кәсіпкер өткен жылы «Бастау бизнес» жобасы аясында 584 мың теңге көлемінде қайтарымсыз грант жеңіп алған. Оған дейін ағасы Саламаттың қасында жүріп, автокөлік орындықтарына арналған қаптар тігумен айналысады. Бір күні Eva кілемшелерге деген сұраныс артып жатқанын аңғарып, оны да тігіп сатуды ойлайды. Содан «Атамекен» кәсіпкерлер палатасына бизнес-жоспарын ұсынып, сәтті қорғап шығады.
– Алғашқыда кәсіпті дөңгелетіп әкету қиынға соқты. «Бастау бизнес» жобасымен ұтып алған қаржыма 10 дана Eva парағы мен тігін машинасын сатып алдым. Содан алғашқы өніміміз шыққанда әлеуметтік желі арқылы жарнамасын жасадық. Бір-бірінен естіп тұтынушылар келе бастады. Қазір шүкір, күніне кем дегенде 2-3 тапсырыс келіп түседі, – дейді Шарапат. Кәсіпкер қазір өнімдерін аудан орталығындағы «Барыс» базарына апарып сатады. Небәрі 24 жасында кәсіптің көзін тапқан азамат: «Табысқа кенелудің құпиясы – тәуекел мен сапалы өнім шығару. Әрбір көлік иесі темір тұлпары үшін жақсы дүниені алғысы келеді. Біз осы үдеден шығу үшін басты орынға сапаны қоямыз. Еvа материалынан жасалған кілемшелер көлік ішін кір мен ылғалдан жақсы қорғайды. Шаң көтермейді әрі өте жеңіл болғандықтан, жуу оңай. Шикізат Ресей мемлекетінен жеткізіледі. Әзірге ол жағынан қиындық туып тұрған жоқ. Жақында автокөліктерге төсеніштер ғана емес, үйге де Еva кілемшелерін тігуді бастадық. Мәселен, күні кеше Қордай ауданындағы балабақшалардың бірінен тапсырыс түсіп, баспалдаққа төсейтін Еvа төсеніштерін тігіп бердік. «Балалардың аяғы таймай, баспалдақпен түсіп-шығу қауіпсіз бола түсті» деп тапсырыс берушілер дән риза болып отыр», – дейді жас кәсіпкер.Әрине, Шарапат Ережепұлындай азаматтардың тірлігі көпке үлгі. Ол өз кәсібін ашамын дегендерге мемлекет тарапынан аз қолдау көрсетіліп жатпағанын айтады. Тек қана ниет қажет. Кәсіпкердің сөзі орынсыз дей алмаспыз. Себебі көршілес Қытай мемлекетінде бизнесті қолдауға жылына бір-ақ рет мемлекеттік бағдарлама қаралады екен. Осы мүмкіндікті мүлт жібермеу үшін жастар жанталасатын көрінеді. Ал бізде кәсіптің қай түрін ашамын десең де, мемлекеттік қолдау да, жоба да жетерлік. Тек тірліктің тетігін тауып, тәуекелге бара білсең болғаны...
Жамбыл облысы