«Былтыр елімізде балама қуат көзін өндіретін 134 нысан тіркелген. Оның ішінде 40 жел стансасы, 49 күн стансасы, 40 гидроэлектр стансасы, 5 биоэлектр стансасы бар. Олар барлығы 2010 МВт қуат өндірген. 2018-2021 жылдары жасыл энергия өндірісі аукцион арқылы жүзеге асты. Оған 12 мемлекеттен 196 компания қатысты. Бұл тәсіл өз тиімділігін көрсетті», – деді Нұрлан Қапенов.Энергетика вице-министрі Жандос Нұрмағанбетов ұсынған дерек бойынша, 2025 жылға дейін жалпы қуаттылығы 1 100 гигаватт болатын жаңартылатын энергия көздерінің 59 жобасы пайдалануға берілуі мүмкін.
«Қуаттылығы 170 мегаватт болатын су-электр стансасы, 960 мегаватт болатын жел-электр стансасы және 277 мегаватт болатын күн-электр стансасы жобаланды. Осылайша, 2025 жылға қарай жаңартылатын энергия нысандарының жеңілдік қуаты шамамен 3 000 мегаватты құрайды немесе жалпы электр энергиясы генерациясының үлесі 6 пайызға жетеді. Бүгінде жаңартылатын энергия көздерін қолдану мақсатында жобаларды іске асыру инвесторлардың меншікті және қарыз қаражаты есебінен жүзеге асады. Яғни, бюджеттен қаржы бөлінбейді. Бұл жобаларды енгізу өңірлерде қосымша сағатына 4,5 млрд киловатт болатын жасыл энергияны өндіруге, тұрақты жұмыс орындарын құруға және шамамен 1,1 млрд доллар инвестиция тартуға мүмкіндік береді», – деді вице-министр комитет отырысында.
Нұрлан ОРАЗҒАЛИЕВ