Қазақстан Тәжікстанға ғарыштық байланыс қызметтерін көрсететін болды

Қазақстан Тәжікстанға ғарыштық байланыс қызметтерін көрсететін болды
Фото: Цифрлық даму, инновациялар және аэроғарыш өнеркәсібі министрлігі

Цифрлық даму, инновациялар және аэроғарыш өнеркәсібі министрлігі Аэроғарыш комитетінің «Республикалық ғарыштық байланыс орталығы» АҚ және «Исател» ЖШҚ (Тәжікстан) Kazsat-3 ғарыш аппаратының транспондерлік сыйымдылығын ұсыну бойынша қызметтерді көрсету туралы шартқа қол қойды. Бұл туралы министрліктің баспасөз қызметі хабарлайды.

Құжатқа сәйкес, Тәжікстанда қазақстандық жерсеріктік байланыс ресурстары арқылы еліміздің алыста орналасқан елді мекендері  үшін байланыс арналары ұйымдастырылады.

«Шартқа «Республикалық ғарыштық байланыс орталығы» АҚ басқарма төрағасының орынбасары Василий Леонов пен «Исател» ЖШҚ директоры Умед Тагоев қол қойды.

«Исател» ЖШҚ компаниясы – «Телерадиоком» ААҚ еншілес ұйымы және Тәжікстандағы байланыс операторы. Оның Душанбе қаласында өзінің телепорты және желілік басқару стансасы бар, елдің мемлекеттік органдары мен жеке компаниялары үшін интернетке қол жетімділікті қамтамасыз етеді.

Халықаралық нарыққа шығу – екі байланыс жерсерігінен және жерүсті басқару кешендерінен тұратын,   Kazsat  ғарыш жүйесін сәтті басқаратын Қазақстанның ұлттық ғарыштық байланыс операторы   «РҒБО» АҚ маңызды міндеттерінің бірі.

Қазақстанның жерсеріктік байланыс жүйесі еліміздің байланыс қызметтері қажеттілігін толығымен қамтамасыз етеді. «Республикалық ғарыштық байланыс орталығы» АҚ Қырғыз Республикасына да ғарыштық байланыс өнімдерін жеткізеді», – делінген министрлік хабарламасында.

Цифрлық индустрия қызметтерінің экспортын ұлғайту – бұл міндетті ел Президенті Қазақстан халқына Жолдауында мемлекет экономикасын дамытудың құрамдас бөліктерінің бірі ретінде атап өтті.

Ғарыштық байланыс саласындағы жаңа халықаралық шартқа қол қою «Республикалық ғарыштық байланыс орталығы» АҚ ұжымының кәсіби жұмысының нәтижесі  және Қазақстан  мен Тәжікстан арасындағы ынтымақтастықтың жаңа даму келешегін ашады.

Aikyn.kz | Бүгінгі жаңалықтар. Әлем және Қазақстан жаңалықтары.