«AMANAT»-тың Атқарушы хатшысы Асхат Оралов бейнеконференция байланысы арқылы партияның өңірлердегі филиалдарымен жиын өткізді. Онда халықпен кездесулер кезінде берілген уәделердің орындалу барысымен танысты.
Аманаттықтар ел аймақтарының басым көпшілігінде болып, онда сайлауалды уәделердің орындалу барысын тексеріп қана қоймай, азаматтардың түрлі мәселеге қатысты өтінішін қарады. Мәселен, Қаңтар оқиғасы кезінде кәсібі зардап шеккен Алматыдағы кәсіпкерлермен кездесу барысында партиялықтар өтемақыны уақытылы төлеу мәселесін бақылауда ұстауға уәде берді.
Жиын барысында партияның қалалық филиалының атқарушы хатшысы Мейіржан Отыншиев 1 594 кәсіпкер, яғни 99%-ы 14,5 млрд теңге көлемінде қаржылай төлем алғанын, бұл бағыттағы жұмыс әрі қарай да жалғасып жатқанын мәлімдеді. Орал қаласында дарынды балаларға арналған №8 мамандандырылған мектеп оқушыларының ата-аналары білім ошағының бірнеше жылдан бері жөндеуге жабылғанын, алайда ешқандай жұмыс жүргізілмей жатқанын айтып шағымданды. Партияның Батыс Қазақстан облыстық филиалының атқарушы хатшысы Мұрат Мұқаевтың айтуынша, облыстық бюджетті нақтылау кезінде жөндеу жұмыстарына қаражат бөлінді. Жұмыс басталып кетті. Оның аяқталу уақыты 2023 жылғы тамызға жоспарланған.
Шымкент қаласында Асхат Оралов «AMANAT» партиясының сайлауалды бағдарламасын іске асыру аясында позитронды-эмиссиялық томографияға арналған жабдық орнатылған қалалық онкологиялық орталыққа барды. Шымкент қаласының және оған жақын орналасқан облыстардың тұрғындары әлі күнге дейін заманауи жабдықта тегін тексеруден өте алмайды. Себебі ПЭТ-зертхана пайдалануға берілмеген. Қалалық филиалдың мәліметінше, томограф қыркүйек айында іске қосылады.
Түркістан облысының Саран ауданында Шорнақ ауылының тұрғындары аудан құрылғаннан бері бір жылдан астам уақыт өтсе де, жолдың нашарлығына және көшеде жарық жоғына назар аударды. Партияның аймақтық филиалы басшылығының айтуынша, Шорнақ ауылындағы көшелерді асфальттау және жарық шамдарын орнату жұмыстары биыл желтоқсан айында аяқталады.
«Кездесулердің қорытындысы бойынша 88 хаттамалық тапсырма берілді. Оның 31-і орындалды. Қалғаны орындалу үстінде. Әр тапсырманың артында құр сандар емес, адам тағдыры тұрғанын түсіну керек. Сондықтан ешқандай мәселе назардан тыс қалмайды. Өңірлік филиалдар осы мәселелерді шешу жолдарын тездетіп, апта сайын ақпарат беріп тұруы тиіс», – деді Асхат Оралов.
