Мәдениет және спорт министрлігінің мәліметіне сүйенсек, соңғы бес жыл ішінде 150 фильм және 8 сериал түсірілуі керек еді. Бұған дейін 135 фильм, 8 сериал шығыпты. 12 жұмыс ұсынылмаған, ал үш фильм туралы ақпарат мүлдем жоқ. Өткен жылы 19 фильм түсіру жоспарланған еді. Оның 11-і жарыққа шықты, алтауы әлі пайдалануға берілген жоқ. Түсірілген фильмдердің ішінде көркем фильмнің ұзақтығы – 100,5 минут, деректі фильм – 50,1 минут, анимациялық фильм – 37,7 минут. Қысқаметражды фильмдердің орташа ұзақтығы – 28,8 минут. 2019 жылы фильмдердің екі түрі түсірілген: ұзақтығы 117,4 минуттық көркем фильм мен орташа ұзақтығы 52,6 минуттық деректі фильмдер. Бес жыл ішінде түсірілген фильмдердің ішінде 57 драма, 75 деректі және үш анимациялық фильм түсіріліпті. Ал 2019 жылы бір драмалық және жеті деректі фильм дүниеге келген екен. Үш фильмнің жанры туралы нақты ақпарат жоқ. Қазақ тіліндегісі 71 фильм, орыс тілінде 58 фильм шығыпты. Ағылшын тілінде төрт фильм, бір фильм екі тілде, яғни қазақ және орыс тілінде шыққан екен. Бір фильм туралы нақты ақпарат кездеспеді. 2019 жылдың қаңтар-қыркүйек айларында 41,2 млрд теңге сомасында фильмдер мен бейнефильмдер, теледидарлық бағдарламалар, сондай-ақ фонограммалар мен музыкалық жазбалар өндірісі бойынша қызмет көрсетілген. Г.БЕКЗАТ