Абай мен Шәмші киген тақияны Коби Брайант та киіпті. Қазақстанның АҚШ-тағы елшілігі қазақтың туын ұстап, тақия киген Кобидің фотосуретін жариялады. Елшілікке ерекше фотосуретті Тимур Несбитт табыстаған. Суретте қара Мамба бір топ қазақстандық баскетболшымен бірге қазақтың туын ұстап, тақиясын киіп тұр. Өз кезегінде елшілік тарихи суретке ризашылығын білдіріп, Коби Брайантты еске алды. «Лос-Анджелес Лейкерс» баскетболшысы Коби Брайант 26 қаңтарда Калифорнияда тікұшақ апатынан қаза тапты. Спортшымен бірге оның 13 жасар қызы да қайтыс болды. Аты аңызға айналған баскетболшының қазасы қазақстандық спорт жанкүйерлерімен қоса әлемді дел-сал күйге түсірді. Кейін белгілі болғандай, сол күні қатты тұман түсіп, тіпті тәртіп сақшыларының тікұшағы да әуеге көтеріле алмаған. Апат салдарынан жалпы саны 9 адам көз жұмды.