Сәлемдесу, амандасу адамның бір-біріне ізет, сый-құрмет көрсетуі болып есептеледі. Күнделікті өмірде біз қанша адаммен кездесіп, қанша жұртпен ұшырасамыз. Солардың бәрінде де бірінші кезекте арамызда сәлемдесу, амандасу жүреді. Адам баласы қашаннан бейбіт, тыныш өмір сүруді аңсап, армандаған. Сол арманның негізінде қолы жеткен зор игілігі – сәлемдесу әдебінің қалыптасуы. Сәлемдесудің кереметі сонда – адамдардың бір-біріне жылы мейірім мен кең пейіл көрсетуінде, достықты, жақындықты бейнелеуінде.
Осы орайда әдет-ғұрып және салт-дәстүр орталығында «Қайырымды қала – Шымкент» концепциясына сәйкес жаңа қалалық ізгілікті мәдениетті қалыптастыруға арналған «Қайырымды қала мәдениеті» жобасы аясында халқымыздың сәлем беру дәстүрі үлгісін насихаттауда «Сәлемің түзу болсын!» атты этнотанымдық шара өтті. Бұл күнді орталық қызметкерлері келген қонақтармен емен-жарқын сәлемдесу әдебімен бастады. Шараға Шымкент қаласы мәдениет, тілдерді дамыту және архивтер басқармасының басшысы Рашид Мамытұлы қатысып, сәлем беру дәстүрі үлгісі арқылы ізгілік мәдениетінің қалыптасатынын, ТМД елдерінің мәдени астанасы болып бекітілген қала тұрғындары үшін мұндай бастама күнделікті әдетке айналса, бұл да қайырымды қала мәдениетіне қосылатын үлес екенін айтып өтті. Қызметкерлердің қатысуымен сәлемдесу үлгілеріне арналған бір отбасы төңірегіндегі әр қилы жастағы отбасы мүшелерінің күнделікті сәлемдесу тәртібі көпшілік назарына ұсынылып, қызу талқыға түсті. Арнайы шақырылған сарапшылар әрбір сәлем үлгісін жіті қадағалап, дұрыс-бұрыстығын жете талқылады.
«Сәлем – сөздің анасы», «Сәлем түзелмей, әлем түзелмейді» дейді дана қазақ. Ендеше әлемді түзегіңіз келсе, асыл сөздің анасы – «сәлеміңіз» қашанда түзу болсын!
Кәмила ҒАЛЫМҚЫЗЫ
