Интернетке тәуелділіктің алдын алады

интернет

AMANAT партиясы жанындағы «Жастар Рухы» жастар қанаты интернет тәуелділіктің алдын алу бойынша онлайн курсқа қатысушыларды тіркеу басталғаны туралы хабарлады.

Курс «Азаматтық бастамаларды қолдау орталығы» КЕАҚ «Жастар мен балалар арасында интернет және YouTube тәуелділіктер мен құмар ойындардың алдын алу бойынша шаралар кешенін әзірлеу және іске асыру» жобасы шеңберінде өткізіліп жатыр.

Ұйымдастырушылардың айтуынша, семинарлардың негізгі мақсаты – балалар мен жасөспірімдерде интернет тәуелділіктің алдын алу және білімді арттыру.

«Қазір лудомания, кибербуллинг, интернетке тәуелділік сияқты терминдерді жиі кездестіреміз. Атап айтқанда, олар біздің балаларымыз бен жастарымызға қатысты. Сондықтан олардың білімін арттыру және интернетке тәуелділіктің алдын алу мақсатында біз GalamTOP атты онлайн курсты іске қостық. Курс келесі тақырыптар бойынша өткізіледі: лудомания, кибербуллингпен күрес, әлеуметтік желілерді қауіпсіз пайдалану, жеке деректерді қорғау. Курсқа 14 жастан асқан оқушылар, сондай-ақ 29 жасқа дейінгі жастар қатыса алады» деп атап өтті «Жастар Рухы» төрағасы Нұржан Жетпісбаев.

Сондай-ақ «Жастар Рухы» төрағасы аталған курстар жоба аясында жүргізілетін кешенді шаралар бағыттарының бірі екенін атап өтті.

«Сондай-ақ қазір жастар мен балалар арасында интернетке тәуелділік, құмар ойындары және кибербуллинг деңгейі жоғары өңірлерді анықтау үшін бүкіл ел бойынша сараптамалық отырыстар және фокус-топтық талқылаулар өтіп жатқанын атап өткім келеді, олардың қорытындылары бойынша тиісті ұсынымдар әзірленетін болады», – дейді Нұржан Жетпісбаев.

Айта кету керек, қатысушылар үшін тіркеу 2022 жылдың 15 тамызына дейін жалғасады. Онлайн курстардың басталуы 2022 жылдың 22 тамызына жоспарланған.

Сондай-ақ жоба мен өткізілетін іс-шаралар туралы толық ақпаратты @galamtop ресми Telegram каналынан алуға болады.

Aikyn.kz | Бүгінгі жаңалықтар. Әлем және Қазақстан жаңалықтары.