«AMANAT» партиясы жанындағы әлеуметтік маңызы бар азық-түлік бағасына мониторинг жүргізіп жатқан қоғамдық топтардың жұмысы белсенді жалғасып жатыр. Атап айтқанда, осы аптада партия мүшелері Атырау мен Қызылордадағы сауда нысандарын тексерді.
Атырау облысында партия мүшелері қырыққабат 67 пайызға немесе 187 теңгеге, сәбіз 38,1 пайызға немесе 268 теңгеге, күріш 40,6 пайызға немесе 412 теңгеге қымбаттағанын тіркеді. Бұл ретте, бірінші сұрыпты бидай ұны 15,7 пайызға арзандап, бір келісі үшін 188 теңгеге қолжетімді бола бастады. Нан 21,8 пайызға арзандап, бір бөлкесі 147 теңгені құрап отыр.
«Баға әркім үшін әртүрлі. Мысалы, маған бір бағаны, келесі тұтынушыға басқа бағаны айтады. Соған қарамастан, адамдар сатып алуға мәжбүр. Себебі басқа амалы жоқ. Неліктен жаз мезгілінде көкөністер соншалықты қымбат? Жаға ұстатарлық жағдай», – дейді зейнеткер Гүлжан Досова.
Тағы бір маңызды мәселе – тауар бағасының жазылып тұрмауы. Мониторинг тобының мүшелері саудагерлерге осыны ескертті.
«Өткен аптадағы тексеру кезінде күріш бағасы 310 теңге еді. Осы аптада оның бағасы 400 теңгеден асты. Ал картоп бағасы 224 теңгеден 190 теңгеге дейін арзандады. Сатушыларға үстеме баға 15 пайыздан аспауы керек деген ескерту жасасақ, «бізге солай айтылған» деп жауап береді. Ал бағаны кім белгілейтінін айтпайды. Баға әр жерде әртүрлі», – дейді мониторинг тобының мүшесі Сәкен Өскенбаев.
Қызылорда облысында пияз бағасы бір келісі үшін 27,3 пайызға немесе 243 теңгеге, ал қарақұмық жармасының бағасы бір келісі үшін 12,5 пайызға немесе 565 теңгеге дейін өсті. Соған қарамастан, сүзбе бағасы бір келісі үшін 44,6 пайызға немесе 961 теңгеге дейін төмендеді. Нан бірден 54 пайызға арзандап, бір бөлкесі 86 теңгені құрап отыр.
«Аптасына екі рет ірі сауда орталықтарын аралап, соның нәтижесінде азық-түлік бағасының төмендегенін байқадық. Бір аптада нан бағасы төмендеді. Барлық мәліметті талдап, саралап, сауда кәсіпорындарының басшыларына және жеткізіп беруші ұйымдарға ұсыныстар жолдап жатырмыз», – деді мониторинг тобының мүшесі Мейрамбек Есжанов.
Қызылорда қаласының тұрғындары да баға өсіміне назар аударып жатыр. Алайда олар «AMANAT» партиясы жанындағы мониторинг жүргізетін топтардың қызметі бағаны төмендетуге оң әсерін тигізіп жатыр деп есептейді.
«Мониторинг топтарының жұмысы бағаны ұстап тұруға көмектеседі. Оларды базарларда және дүкендерде жиі көремін. Мүмкін, сондықтан да сатушылар әртүрлі жеңілдік акцияларын жиі өткізе бастаған шығар», – дейді жергілікті тұрғын Ақмарал Жандәулетова.
Естеріңізге сала кетейік, өткен аптада еліміздің барлық облысы мен ауданында мониторинг және қадағалау жүргізетін 216 партиялық топ жұмысқа кірісті. Мониторинг топтары күн сайын жұмыс істейді. Аймақтардағы әлеуметтік маңызы бар азық-түлік бағасының өзгергеніне қатысты мәлімет тің мән-жайы Партиялық бақылау комиссиясының отырысында қаралады. Өзгеріс анықталған жағдайда мәселені шешу үшін ұсынымдар әзірленіп, нақты мерзімі мен жауапты тұлғалар белгіленеді.
