Нұр-Сұлтанда зейнеткердің ақшасын қолды қылған ұры саусақ іздері арқылы табылды

Нұр-Сұлтанда зейнеткердің ақшасын қолды қылған ұры саусақ іздері арқылы табылды

Нұр-Сұлтанда зейнеткердің ақшасын қолды қылған ұры саусақ іздері арқылы табылды. Елордалық 79 жастағы әйел полицияға хабарласып, белгісіз ер адам 90 мың теңге ақшасын алып кеткенін айтқан. Зейнеткер дүкеннен келе жатқанда оған бейтаныс ер адам жақындап, ауыр сөмкесін көтеріп, көмектесетінін айтқан. Әйел келіскен.

Жолда сөйлесіп келе жатып, ер адам қалалық ауруханада жұмыс істеймін деп, зейнеткерге массаж жасап беруді ұсынған. Азаматша ештеңеден күмәнданбастан, ер адамды үйіне алып барған. Ер адам массаж жасап болғаннан кейін жәбірленушінің сөмкесінен ақшаны алып, ізін суытқан.

"Арызданушының мекенжайы бойынша жедел-тергеу тобы шыққан. Қылмыс орнын қарау барысында "Сарыарқа" ауданы ПБ криминалисі, капитан Алмат Абдиев күдіктінің қол саусақтарының ізін алған. Полицей жуынатын бөлмеден іздерді тапқан. Қылмыскердің қол саусақтарының ізі деректер базасында болғандықтан, тез арада сәйкестендірілді. Жедел-іздестіру шаралары барысында полицейлер бұрын ұрлық жасап сотталған 40 жастағы ер адамды ұстады", - деп хабарлады Нұр-Сұлтанның полиция департаментінен.

Бүгінде күдікті кінәсін мойындады және ПД уақытша ұстау изоляторына қамалды. "Ұрлық" бабымен соталды тергеп-тексеру жүргізіліп жатыр.

Aikyn.kz | Бүгінгі жаңалықтар. Әлем және Қазақстан жаңалықтары.