Жыл сайын Мәжілістің ең бірінші төрағасы Марат Оспановтың аруағына тағзым етіп, құрмет-қошемет білдіру – Парламенттің осы палатасында игі дәстүрге айналды. Елбасының қанаттасы, белгілі мемлекет және қоғам қайраткері, 20 жыл бұрын дүниеден өткен Марат Тұрдыбекұлына арналған конференция аясында «Отанға адал қызмет ету» атты кітаптың тұсауы кесілді. Іс-шараға Мәжіліс Төрағасы Нұрлан Нығматулин, Парламент депутаттары, қоғам қайраткерлері, сондай-ақ М.Оспановтың отбасы мүшелері, туған-туыстары және жақындары қатысты.
– Марат Оспанов туралы естеліктер Қазақстанымыздың егеменді ел атанған тарихи кезеңімен қатар айтылады. Себебі Марат Тұрдыбекұлы Тұңғыш Президент Нұрсұлтан Назарбаевтың сенімді серігі бола жүріп, тәуелсіздікке жету, оны қалыптастыру және дамыту жолында аянбай еңбек етті, – деді конференцияны ашқан спикер.М.Оспановтың мол біліміне, ерекше қабілетіне, батыл мінезіне сүйсініп, оның Қазақстанның заманауи салық жүйесін қалыптастыруға және ілгерілетуге, шетелдік инвестициялар тартып, тиімді пайдалануға, сонымен қатар отандық парламентаризмді дамытуға зор үлес қосқанына тоқталған Нұрлан Зайроллаұлы оның еңбек жолы ұрпаққа үлгі болатынын атап өтті. Марат Оспанов басқарған жылдары Парламент палатасы жан-жақты және табысты еңбек етті. Заң шығарушы орган 400-ден астам заң қабылдаған. Сол уақытта өмірге жолдама алған барлық заңдарда, соның ішінде экономикалық құжатта Марат Тұрдыбекұлының қолтаңбасы, жеке үлесі бар.
– Ол тек заң шығару қызметімен айналысып қана қоймай, қоғамдық жұмысқа, соның ішінде мәдениет, спорт саласын нығайтуға белсене араласты. Марат Оспанов – бүкіл өмірін егемен еліміздің дамуына арнаған білікті саясаткер, іскер басшы, қайраткер тұлға, – деді Н.Нығматулин.М.Оспановпен бірге жұмыс істеген әріптестері, қасында жүрген достары өз естеліктерінде тұлғаның адамгершілік және кәсіби қасиетіне назар аударды. Екі тілде шыққан кітапта М.Оспанов пен оның азаматтық ұстанымы, адами қыры туралы естеліктер жинақталған. Конференция аясында Мәжілісте фотокөрме ұйымдастырылды, онда Мәжілістің тұңғыш спикері өмірі мен қызметінің жарқын сәтін бейнелейтін мұрағаттық фотосуреттер ұсынылды. Айхан ШӘРІП