Сәні кеткен саябақ

саябақ

Қызылорда облысына қарасты Тасбөгет кентінің­ орталығындағы саябақ жетімсіреп тұр. Тұрғылықты халық көп жылдан бері қараусыз тұрған демалыс орнының­ талдары қурап, оталып жатқанына ала­ңдайды.

Бүгінде саяжайларды қосқанда 30 мыңнан астам тұрғыны бар Тасбөгет кентінің аумағы жыл санап кеңейіп келеді. Халқының саны да едәуір өскен.

Десек те, кентте жергілікті жұртшылықтың бір мезгіл көңіл серпілтіп, серуендейтін демалыс орны жоқтың қасы. Соның ішінде тасбөгеттіктердің маңдайына біткен жалғыз демалыс орны – осы орталық алаңда орналасқан саябақ. Оның өзі де қанша жылдан бері күтім көрмей, жүдеу күйге түскен.

Саябақтың ескерусіз орынға айналуына да себеп бар. Бір кездері жекенің қолына өткен демалыс орнына ешқандай жөндеу жұмыстары жүргізілмеген, күтім жасалмаған. Арықтары да аршылмай, қоқысқа толып қалған.

Саябақтың ішін жасыл желекке көмкерген талдардың да өңі шөлден солғын тартып тұр. Қурап кеткендері де бар.

Биылдан бастап өңірге жаңа мешіт құрылысын салу жайы сөз болып, кентке кіре беріс жерден арнайы орын белгіленіп іргетасы қаланды. Бүгінде құрылысы қарқын алған мешіт ғимараты дәл осы саябақпен жапсарлас орналасқан. Оған қоса, саябақ аумағынан санитарлы-эпидемиологиялық қызметтің зертханасы мен 5 қабатты тұрғын үй ғимараты да бой көтеріп жатыр. Әлбетте, мұндай игі бастамалар тұрғылықты халыққа зор қуаныш сыйлады.

Алайда осы жұмыстар қарқын алған сәттен бастап саябақ іші құрылыс алаңына айналғанына жұртшылық наразы.

Онсыз да ағын суға жарымай, шетінен қурап жатқан талдар енді түбінен кесіліп, жойылып жатыр. Бұған дейін жекенің қолына өтіп, жетімнің күйін кешкен демалыс орны енді тіптен жойылып кетудің аз-ақ алдында тұр.

«Бұл саябақ кенттің орталығында орналасқан. Бұрындары демалыс орны жасыл желекке оранып, кент көркіне өзгеше рең беріп тұрушы еді. Бүгінде саябақ ішінде талдар азайып, күн өткен сайын тоз-тозы шығып барады. Бұған дейін жекенің қолына өткендіктен қараусыз қалғанын айтып, өз-өзімізді жұбататын едік. Ал биыл тіпті жойылып кетуге шақ тұр. Әлі де құрылыс нысандарына кенттен басқа орын табылмағанына қайран болып жүрміз. Жалғыз саябақты жұлым-жұлым күйге түсіргенше, жөндеу жұмыстарын жүргізіп, абаттандырып, халық игілігіне беруі тиіс еді», – дейді Тасбөгет кентінің тұрғыны Сапар Ерімбетов.

Тұрғындардың айтуынша, кент те аптапты ыстықта сая болатын басқа саябақ жоқ. Кешкілік серуендеп, демалатын орындар да саусақ пен санарлық. Ал жалғыз саябақтың келешегі қалай болары беймәлім. Бұл саябақ та құрдымға кетсе, тұрғылықты халықтың бір мезгіл сейіл құратын орны қалмайды.

«Бұл саябақтың келешегі қалай болатыны белгісіз. Ертеректе бұл демалыс орны жекенің қолына берілгенде де келешегі қалай болады деп алаңдаған едік. Бірақ бұл жолғы жағдай тіпті бөлек. Өсіп тұрған ағаштарға аяқсу жетпей, қурап жатқаны аздай, енді құрылыс алаңына айналды. Бәлкім бір ойлағандары бар шығар. Алайда бүгінгі күйіне алаңдап отырмыз», – деп ойын толықтырды С.Ерімбетов.

Негізі осыдан біраз жыл бұрын жеке кәсіпкердің қолына өткен бұл орталық саябақта көптеген игі бастамалар қолға алынады деп жоспарланғаны жұрт жадынан шыға қойған жоқ. Сол кезде аумақты нағыз қазақ мәдениетінің кәусарына сусындап, ерекше көңіл-күйге бөленетін бірден-бір орынға айналдыру жоспарланған. Алайда, тәп-тәуір басталған игі бастама жар ортадан тоқтап, саябақ бәз-баяғы таз қалпына қайта түскен болатын.

Жергілікті жұртшылықтың басты талабы – орталық саябақтағы жапырағын жайған талдарды құрдымға жібермей сақтап қалса дейді. Осылайша, кентте қоныстанған халықтың тынығатын жалғыз демалыс орнын қайта жандандырып, ел игілігіне берілгенін қалайды.

Ербақыт ЖАЛҒАСБАЕВ,

Қызылорда облысы

Aikyn.kz | Бүгінгі жаңалықтар. Әлем және Қазақстан жаңалықтары.