Әли Тұрғанбековтің футбол жұлдыздарымен жүздесіп жүргеніне көп болды. Осыған дейін Месси, Андрей Шевченко, Неймар, Мбаппе, Кавани мен Марадонамен кездесті. Кафу, Хулио Сезар, Бебето мен Хави қолтаңбасын беріп, жылы лебізін білдірді. Ливерпуль ойыншыларына УЕФА Суперкубогын тапсырған ол бұл жолы Модричпен футбол ойнады. «Реал» ойыншысы, «Алтын доп» иегері Лука Модрич Әли Тұрғанбековпен кездесті. Қазақстандық футбол жанкүйерімен танысып, тілдескеніне ойыншылар дән риза. Өйткені олар футболдың жай ғана ойын емес екенін күллі әлемге дәлелдеп жүр. Спорт бағдарламаларын үзбей қарайтын Әлидің футболға деген құштарлығы бөлек. Соның арқасында әлемді аралап, әйгілі футболшылармен сұхбат құрып жүр.
Әли Тұрғанбековпен жүздескен Модрич Instagram-ға арнайы жазба жариялады. Әлимен танысқанын айтып, оған әлемді шабыттандыруға үлес қосуын жалғастыруын сұраған. Әрі футболдың жай ғана спорт емес екенін атап өткен.Өз кезегінде Әли Модричке рақметін айтып, осындай сәт сыйлаған Жаратқанға шексіз алғыс білдірді. Бұл жайында ол Instagram-ға жазба жариялап, хорват ойыншысымен футбол ойнаған видеосын жүктеді. Бұдан бұрын ол «Реал Мадрид» шабуылшысы Карим Бенземамен жолыққан. Әли мен «Реалдың» тоғыздығы бірге түскен фотоны Хабиб Нурмагомедов жариялап, Бенземаға ерекше ықыласын айтқан. Осындай ізгі іс істеген Хабиб пен Тұрғанбеков Алматыда аралас жекпе-жек кешінде кездесті. UFC үздігі Әлиге «ПСЖ» футболшылары қол қойған доп тарту етті. Сондай-ақ ол жас жанкүйерді Криштиану Роналдумен тілдестіремін деп уәде берген еді. Көп өтпей уәдесін орындап, Әли Италияға сапар шекті. А.ЖОЛДАС