Түркістан облысында зияткер жастарды біріктіретін жаңа жоба іске қосылды. «AMANAT AQYLMAN» – шешендік өнер мен азаматтық танымды дамыту, толеранттық тәртіпке баулу, жастар арасындағы қарым-қатынасты нығайту бағытындағы интеллектуалды ойын алаңы. «AMANAT» партиясы Түркістан облыстық филиалының қолдауымен және «Жастар Рухы» жастар қанатының ұйымдастыруымен жобаның тұсаукесері Арыс қаласында өтті. Жиынға облыстық партия филиалының атқарушы хатшысы Бейсен Тәжібаев, Арыс қалалық филиалдың атқарушы хатшысы Бақтығали Ділдәбеков, аудандық мәслихат хатшысы Амантай Байтанаев, қалалық әкімдіктің аппарат басшысы Талғат Анашбеков, облыстық «Жастар Рухы» жастар қанатының төрағасы Жансерік Жұман және белсенді мүшесі Олжас Мамыр, қалалық жастар ресурстық орталығының директоры Мөлдір Сарыпбекова қатысты.
– Ең алғашқы ойынды теміржолшылар қаласынан бастауды ұйғардық. «AMANAT AQYLMAN» – интеллект пен мәдениетті, өзара қарым-қатынасты дамытып, шапшаңдық, тапқырлық және жан-жақтылықты дағдыға айналдыратын, таным көкжиегін кеңейтетін жастар ордасы болмақ. Біз жастармен кездескенде пікірлерін тыңдап, ой алмасамыз. Тиімді жобалары болса, ұсынуларын айтып жүреміз. Басым бөлігі білім бағытын қолға алуды сұрайды. Бұл сұраныс бізді де қуантты. Осылайша партияның облыстық филиалы тарапынан жаңа жобаны өткізу идеясы туындады. Бастауыш партия ұйымдарына қайтарылған 20 пайыз жарна аясында осы секілді жобаларды жүзеге асырамыз. Ал, «AMANAT AQYLMAN» өңіріміздің барлық аудан, қаласында өткізіледі. Жеңімпаздар облыс орталығы Түркістан қаласында өтетін ақтық сайысқа жолдама алып, бақ сынайды. Жыл соңында кіл мықтыны анықтаймыз. Бүгінгі ойында белсенділік танытып, қатысқандарыңызға алғыс білдіреміз, – деді Бейсен Дәулетұлы.Әр команда 5 адамнан құралды. Ойынға 9 топ қатысып, 4 кезең бойынша сайысты. Қатысушыларға қала тарихы, өнер саласы, партиялық жобалар мен мемлекеттік басқару саласына сұрақтар қойылды. Тартысқа толы интеллектуалды ойын қорытындысы бойынша 3-орынды қалалық әкімдіктің мамандарынан құралған «Ел тірегі» командасы иеленсе, 2-орыннан құрамында партия қызметкерлері және депутаттары бар «Парасат» тобы көрінді. Қалалық жастар ресурстық орталығының ұжымынан құралған «Болашақ» командасы 1-орынды қанжығаға байлап, жеңімпаз атанды. Жүлдегерлер қаржылай және арнайы сыйлықтармен марапатталып, оларға Арыс қаласы әкімінің алғыс хаты табысталды.
Азат ҚАЗАҚ