Жамбылдық полиция қызметкерлері жаппай тәртіпсіздік кезінде ұрланған қаруларды іздеу барысында 5 қару, 2 РГД гранатасы және әртүрлі калибрлі 200-ден астам патрон тапты. Тәркіленген қарудың ішінде 1 Калашников автоматы, 2 «ТОЗ-8» мылтығы, 2 аңшы мылтығы бар.
Сондай-ақ, полиция қызметкерлері Тараз қаласындағы қоқыс жәшіктерінің бірінің жанынан биылғы қаңтарда Жамбыл облысы полиция департаментінің ғимаратынан ұрланған «АҚСУ74» автоматы мен сигналдық зымыран салынған қап тауып алды.
Табылған бүкіл қаруға сот-баллистикалық сараптама тағайындалды.
Жамбыл облысының полиция департаменті қарудың, оқ-дәрілердің, арнайы құралдардың орналасқан жерін хабарлаған немесе оны полицияға өз еркімен тапсырған адам басқа құқық бұзушылықтарға қатысы болмаса, қылмыстық және әкімшілік жауапкершілікке тартылмайтынын еске салады. Аноним қалатынына кепілдік беріледі.
