Қостанай облысы Әулиекөл ауданында орман өртеніп, Ахмет Байтұрсынұлының 150 жылдық мерейтойы кейінге шегерілген болатын. Бұл туралы ұйымдастыру алқасы хабарлады.
«Биыл 3-5 қыркүйек күндеріне жоспарланған Ахмет Байтұрсынұлының 150 жылдық мерейтойына арналған іс-шаралар Әулиекөл ауданындағы төтенше жағдайдың салдарынан кейінге шегерілген еді. Өрттен кейін қалыпты тіршілікке оралған Қостанай облысында ұлт ұстазының мерейтойы 1 қазан күні атап өтіледі. Мерекелік шаралар Ахмет Байтұрсынұлы және Торғай ауылында өтеді.
Жоспар бойынша Сарытүбек қонысында Ахмет Байтұрсынұлының кесенесіне тағзым жасау, музей-үйдің тұсаукесері өтіп, ас беріледі. Торғай ауылында спорттық шаралар (қазақ күресі, ат жарысы), ескерткіштің ашылуы, реэкспозициядан кейінгі А.Байтұрсынұлы мен М.Дулатұлының әдеби музейінің тұсаукесері, ғылыми-практикалық конференция жоспарланған» делінген ресми хабараламада.
Бұған дейін Біріккен Араб Әмірлігі Қостанай облысындағы орманды қалпына келтіруге 1 миллион доллар аударғанын жазған болатынбыз.
