Смайылов пен Бланше инфляция, жұмыспен қамту мәселесін талқылады

Смайылов пен Бланше инфляция, жұмыспен қамту мәселесін талқылады
Фото: primeminister.kz

Премьер-Министр Әлихан Смайылов Халықаралық валюта қорының басшысы Николя Бланшемен Қазақстандағы жаңа экономикалық реформаларды іске асыру мәселесін талқылады. Бұл туралы Үкіметтің баспасөз қызметі хабарлады.

Тараптар еліміздегі миссия жұмысының қорытындыларын, сондай-ақ Қазақстан Үкіметінің инфляцияға қарсы күрес, салықтық әкімшілендіру мен бюджеттік жоспарлаудың тиімділігін арттыру шараларын, жұмыспен қамтуды қамтамасыз ету, цифрландыру және мемлекеттің экономикадағы үлесін төмендету мәселелерін талқылады.

Сонымен қатар Қазақстанның 2060 жылға дейінгі көміртегі бейтараптығына қол жеткізу жөніндегі бастамалары, инвестициялар тарту жөніндегі қадамдары, ағымдағы сыртқы экономикалық сын-қатерлер және өңірлік күн тәртібіндегі басқа да өзекті мәселелер қаралды.

«Біз ХВҚ-мен серіктестіктің стратегиялық маңыздылығын және қордың еліміздің дамуына қосып отырған үлесін жоғары бағалаймыз», – деді Әлихан Смайылов.

Өз кезегінде Николя Бланше Қазақстанда жүргізіліп жатқан реформаларға және ХВҚ елдік миссиясының жұмысына жоғары баға берді.

«Біздің арамызда берік және сындарлы ынтымақтастық қалыптасты. Біз Үкіметтің жаңа реформаларды іске асыру жөніндегі қадамдарын құптаймыз және барлық мүдделі бағыттар бойынша консультацияларымыз бен техникалық көмегімізді ұсынуға дайынбыз», – деді Николя Бланше.

Кездесу соңында Премьер-Министр екіжақты өзара іс-қимылды жалғастыруға дайын екенін атап өтті.

Байқау айқын
Байқау айқын
Aikyn.kz | Бүгінгі жаңалықтар. Әлем және Қазақстан жаңалықтары.