Қырғыз елінде заңсыз жүрген 5 бала Қазақстанға қайтарылды

Қырғыз елінде заңсыз жүрген 5 бала Қазақстанға қайтарылды
© turkystan.kz

Оқу-ағарту министрлігінің Балалардың құқықтарын қорғау комитеті бес баланы елге қайтарды. Еліміздің кәмелетке толмаған азаматтары Қырғыз елінде заңсыз жүрген.

2022 жылдың басынан бері Қырғыз Республикасынан 3 қыз және 2 ұл елге қайтарылды.

«Балалардың құқықтарын қорғау комитеті балалардың мүддесі үшін ауқымды жұмыс атқарып жатыр. 2022 жылдың басынан бері ҚР Оқу-ағарту министрлігінің Балалардың құқықтарын қорғау комитеті Қырғыз Республикасының аумағынан барлығы 5 кәмелетке толмаған баланы, соның ішінде 3 қыз және 2 ұл баланы елге қайтарды. 2011 жылы туған қыз Қырғызстанның Панфилов ауданында заңсыз болған. Қолда бар ақпаратқа сәйкес, баланың анасы көрші мемлекетке барып, қызын тәрбиелеуге тиісті құжаттарды ресімдемей, бейтаныс адамдарға тапсырған. Бала жақын туысының өтініші бойынша Қазақстанға қайтарылды. Сондай-ақ 2009 және 2011 жылдары туған әпкесі мен інісі Бішкекте болған. Қазақстан  мен Қырғыз Республикасының мемлекеттік органдары арқылы балаларды елге қайтару қажеттілігі туралы өтініш келіп түсті. Тағы бір жағдай 2010 және 2015 жылы туған ағасы мен қарындасы Қырғыз Республикасының  Ош облысы  Қара-Суй ауданында болған. Балалар туыстарында заңсыз болған және олар анасының өтініші бойынша елге қайтарылды, – деді ҚР Оқу-ағарту вице-министрі Ғани Бейсембаев.

Іс-шара барысында кәмелетке толмағанның барлығы Алматы қаласындағы Балаларды қолдау орталығына жеткізілді. Қазір  қолданыстағы заңнамаға сәйкес, балаларды туыстарына беру жұмыстары аяқталды немесе жүргізіліп жатыр.

ҚР Оқу-ағарту министрлігінің Балалардың құқықтарын қорғау комитеті ТМД қатысушы мемлекеттер арасындағы кәмелетке толмағандарды тұрақты тұратын мемлекеттеріне қайтару мәселелері бойынша ынтымақтастық туралы келісімге сәйкес, ата-анасының немесе заңды өкілдерінің өтініші бойынша балаларды қайтаруға қолдау көрсетеді.

Қазақстан  азаматтарынан тағы өтініштер түскен жағдайда мұндай жұмыстар жалғасын табады.

Байқау айқын
Байқау айқын
Aikyn.kz | Бүгінгі жаңалықтар. Әлем және Қазақстан жаңалықтары.