Тегінде, адам баласы адам баласынан ақыл, ғылым, ар, мінез деген нәрселермен озбақ. Абай
І. БІЗДІҢ БАСТЫ БАЙЛЫҒЫМЫЗ – АДАМ Әрбір адам лайықты білім мен медициналық көмек алуға, жеке қауіпсіздігінің қорғалуына, ыңғайлы әлеуметтік орта мен жайлы үйде тұруға құқылы. Қазақстан азаматы өз елі, өз жерінде алдағы болашағына алаңдамайтындай өмір сүруі керек! БЕРЕКЕЛІ ОТБАСЫ «Отан отбасынан басталады». Отанды сүю, елге адал қызмет ету, қоғамның белсенді де жауапты мүшесі болу, тұлғалық қалыптасу – отбасындағы тәрбие мен тағылымның жемісі. Біз отбасы институтының беделін көтеруге күш саламыз. Демографиялық өсімге, барлық отбасылардың балаларын алаңсыз тәрбиелеп, келешекке сеніммен қарауына лайықты жағдай жасау – біздің басты міндетіміздің бірі. Ана мен балаға лайықты қамқорлық, дамыған әлеуметтік инфрақұрылым, қолжетімді баспана – отбасы әл-ауқатының ең маңызды және айнымас шарттары деп есептейміз. БІЛІМДІ ЕЛ Білім мен ғылымға салынған инвестиция – болашаққа салынған инвестиция. Біз тың идеяларға ашық, сыни және креативті ойлай алатын, ізденімпаз, өмірін білім мен кәсіби қабілетін жетілдіруге арнауға дайын азаматтарды тәрбиелеп шығаруымыз қажет. Бұл – зияткер, озық ойлы ұлтты қалыптастырудың негізгі алғышарты. «AMANAT» партиясы білім, ғылым саласын дамытуға басымдық беріп, қаржыландыруды ұлғайту қажет деп санайды. Балабақшалар, мектептер, оқу орындарындағы жатақханалар қолжетімді, ыңғайлы және қауіпсіз болуы керек. Бәсекеге қабілетті білімнің негізі – білікті ұстаздар, сапалы оқулықтар, білімді объективті бағалау. Мектеп тек оқытып қана қоймай, тәрбие беретін болады. Біз спорттық және шығармашылық үйірмелердің үздіксіз жұмысына қол жеткіземіз. Біз ауыл мен қала арасындағы алшақтықты жоямыз. Инклюзивті бағдарламалар, оңалту және түзету көмегі ерекше балалардың қажеттіліктерін толығымен қанағаттандыратын болады. Жас ғалымдардың әлеуметтік мәселелерін түбегейлі шешіп, олардың алаңсыз ғылыммен айналысуына қолайлы жағдай жасау маңызды. ХАЛЫҚ САУЛЫҒЫ «Бірінші байлық – денсаулық» дейді халқымыз. Денсаулық – кез келген мемлекеттің, ұлттың даму деңгейіне өлшем болатын маңызды индикатордың бірі. Денсаулық, медицина саласында кезек күттірмейтін мәселелер аз емес. Азаматтардың жоғары стандартты, сапалы медициналық ем қабылдауына мүмкіндік жасау керек. Сапалы әрі арзан дәрі-дәрмектердің қолжетімді болуы шарт. Заманауи емханалар мен ауруханалар жеткілікті болуы қажет. Барлық ауылдық жерлерде фельдшерлік-амбулаториялық және медициналық бекеттер ашып, оларды тиісті құрал-жабдықтармен, дәрі-дәрмектермен толықтай қамтамасыз ету керек. Сапалы үздіксіз білім беру, медицина қызметкерлерін әлеуметтік қолдау және қорғау өз ісіне және мемлекетіне шын берілген жоғары білікті мамандардың медицинаға келуін қамтамасыз етуі тиіс. ЕҢБЕК – ТАБЫСТЫҢ КІЛТІ «Білімді болуға оқу керек. Бай болуға кәсіп керек. Күшті болуға бірлік керек. Осы керектердің жолында жұмыс істеу керек» А.Байтұрсынұлы Жасампаз еңбек қоғамды біріктіруші күшке айналуы тиіс. Әр адамның еңбек етуге мүмкіндігі болуы қажет, жұмыстан аман-сау қайтып, отбасымен бірге уақыт өткізіп, ертеңіне сенімді болуы керек. Ол үшін біз жұмыс орнындағы қауіпсіздікті бақылауды күшейтеміз, еңбек құқықтарының қорғалуын қамтамасыз етеміз және кемсітушіліктің барлық түрлерімен күресеміз. Біз қоғамымыздағы жалақы аздығы мәселесін шешуіміз керек. Біз жұмыссыздықтың нақты статистикасын жүргізіп, онымен күресетін боламыз. Еңбек қатынастары жүйесінде «көше заңына» орын болмайды. Біз қызметкерлер мен жұмыс берушілер арасында өркениетті және сындарлы диалог ұйымдастырамыз.Әділдік жоқ жұртта береке-бірлік болмайды. Әлихан Бөкейхан
ІІ. АЗАМАТТЫҚ ҚОҒАМ – ДАМУДЫҢ КЕПІЛІ Азаматтық қоғам – еліміздегі заңдылық пен тәртіптің, өркендеудің басты қозғаушы күші. Қоғамдық ой мен мораль, соған сай іс-әрекет жаңа әлеуметтік қатынастарды, инклюзивті орта мен жаңа саяси мәдениетті қалыптастыруға, әділетсіздік пен заңсыздықтардың, жемқорлықтың алдын алуға, құбылмалы заманда еліміздің қауіпсіздігі мен тұрақтылығына тірек болуы тиіс. ТҮРЛІ КӨЗҚАРАС – БІРТҰТАС ҰЛТ Халқымызда «Төртеу түгел болса, төбедегі келеді, алтау ала болса, ауыздағы кетеді» деген ұлағатты ұстаным бар. Мемлекеттің тұтастығы, елдің татулық, бірлігі, қоғамның қауіпсіздігі ешкімнің қолжаулығына, ойыншығына айналмауы керек. Бұл – айнымас ақиқат. Қоғамда қордаланған әлеуметтік, тұрмыстық мәселелер ақыл-парасатпен, диалог арқылы, қоғамдық келісім аясында шешілгені абзал. Қоғамда плюрализм мен пікір еркіндігі, демократиялық қағидалар салтанат құруы тиіс. Азаматтардың бірігуге және өз мүдделерін қорғау құқығы толығымен жүзеге асырылуы тиіс. Бұл саяси салада салауатты бәсекелестік туғызады. Біз азаматтық жауапкершіліктің ең жоғары түрі ретінде еріктілік пен қайырымдылықты ынталандыруымыз керек. Қазақстан қоғамы тең құқықтар мен мүмкіндіктердің алаңына айналуы керек. ЫРЫС АЛДЫ – ЫНТЫМАҚ Қазақстан – әлемге татулық пен тұрақтылықтың, бейбітшілік пен келісімнің алтын бесігі ретінде танылған мемлекет. Бірлік – мемлекетіміздің іргетасы. Біз жалпыұлттық бірегейлігімізді нығайта отырып, еліміздегі ұлтаралық татулыққа, конфессияаралық келісімге сына қағуға ешқашан жол бермейміз. Біз тегіне, әлеуметтік, лауазымдық және мүліктік жағдайына, жынысына, нәсіліне, ұлтына, дінге көзқарасына, нанымына, тұрғылықты жеріне қарай кез келген кемсітушілікті айыптаймыз. ӘЛЕУМЕТТІК ӘДІЛДІК Біз әрбір қазақстандықтың бақытты өмір сүруіне жағдай жасайтын боламыз. Қазақстанда әлеуметтік әділдік салтанат құратын уақыт жетті. Біз жүзеге асырылып жатқан түбегейлі реформалар аясында «әлеуметтік мемлекет» құру бағытын таңдадық. Біз әлеуметтік әділдікті заң жүзінде, іс жүзінде қалпына келтіруге үндейміз. Конституциямызда жердің қойнауы, табиғи ресурстар халықтың меншігі деп жазылған. Елімізде өндірілген мұнайдың әрбір тамшысы, қазба байлығының әрбір түйірі, егінінің әрбір сабағы халықтың игілігіне айналуы керек. Азаматтар өздерінің адал еңбегі, маңдай теріне сай лайықты жалақы, зейнетақы алуға толық құқылы. Көп балалы аналардың, әлеуметтік жағдайы төмен отбасылар мен мүмкіндігі шектеулі жандардың жәрдемақысын, өзге жеңілдіктерді кеңейтетін боламыз. Қыз-келіншектердің, әйелдердің сапалы білім алуын, мемлекеттік және басқа да қызметтерге белсенді араласуын ынталандыратын боламыз. Біз олигополиялық жүйенің қалыптасуына, қолдан жасалған монополист компаниялардың күшеюіне, мемлекеттік экономикалық ресурстардың таңдаулы қолдарға үлестірілуіне, рейдерлікке жол бермейміз. РУХАНИЯТ – ҰЛТТЫҢ МӘЙЕГІ Жаһандану дәуірінде ұлттың өз болмысын, төлтума табиғаты мен дәстүрінің қаймағын бұзбай сақтап отыруы оңай емес. «AMANAT» партиясы тарихымызды дәріптеу, руханиятымызды жаңғырту бағытындағы бастамаларды ары қарай да жалғастыра береді. Бұл – біздің ұлтымыздың, халқымыздың алдындағы перзенттік парызымыз. Ұлттық өнер және спорт түрлерін кеңінен насихаттап, әлемдік деңгейде танылуына жан-жақты жағдай жасаймыз. Дәстүрлі музыканы, кино және мультипликация, басқа да өнер түрлерінің жаңа туындылармен толығуына қолдау көрсетеміз. Қазақ әдебиетінің өркендеуіне және әлем тілдеріне аударылуына барынша қолдау жасаймыз. Қазақ тарихындағы барлық ақтаңдақтардың бетін ашып, ұлт өміріндегі тағдыршешті кезеңдер мен оқиғаларға тиісті, лайықты баға беретін уақыт жетті.Тәуелсіздігімізді сырттың алакөздігінен, іштің алауыздығынан аман сақтап қалу – біздің тарих алдындағы ең басты парызымыз. Әбіш Кекілбайұлы
ІІІ. МЕМЛЕКЕТ ЖӘНЕ БІЗ Біз мемлекетіміз бен тәуелсіздігіміздің іргесін шайқалтатын ішкі-сыртқы күштердің әрекеттеріне, қолдан жасалған арандатушылықтарға жол бермейміз. Алдымызда сынақтар аз болмайды. Сондықтан қазіргі кезең қара басымыздың қамын емес, мемлекеттің, ұлттың келешегі мен қауіпсіздігін ойлайтын уақыт. ҰЛТТЫҚ ҚАУІПСІЗДІК Мемлекеттің егемендігі мен аумақтық тұтастығы – ел болашағының басты кепілі. Енді әлем бұрынғыдай болмайды. Дүниежүзінің түкпір-түкпірінде бітіспес даулар мен қақтығыстар көбейіп келеді. Жаңа соғыс ошақтары пайда болды. Қандай жағдай болмасын, Отанымызды қасық қанымыз қалғанша қорғауға міндеттіміз! Ұлттық армия еліміздің айбынды қорғаны мен қалқаны болуы тиіс. Қазақ армиясының қатарында тәртіп орнатып, оны заманауи қару-жарақпен қамтамасыз етіп, әскери білімді дамыту қажет. Жоғары ұйымдастырылған құтқару қызметтері біздің азаматтарды табиғи апаттардың зардаптарынан қорғауы керек. Қазақстандық мамандардың көмегімен біз кибершабуылдарға төзімді отандық ақпараттық жүйелерді әзірлеуіміз керек. Ұлттық ақпараттық кеңістікті сыртқы және ішкі қауіптерден қорғау, ақпараттық қауіпсіздікті нығайту – кезек күттірмейтін міндет. Сыртқы саясат Қазақстанның ұлттық мүддесін басшылыққа ала отырып жүргізілуі керек. ТІЛ – МЕМЛЕКЕТТІҢ ЖАНЫ «Тілі жоғалған ұлттың өзі де жоғалады» Халқымыздың тарихы да, тағдыры да, болашағы да – ана тілінде. Қазақ тілі – мыңдаған жылдық мәдениетіміздің, өркениетіміздің негізі, діңгегі. Біз Қазақстанның әрбір азаматы мемлекеттік тілді білуге міндетті деп санаймыз. Бұл – әрбір қазақстандықтың парызы. Біз бұдан әрі де мемлекеттік тілдің қолданыс аясын кеңейте отырып, ана тіліміздің мәртебелі және қажетті қатынас құралына айналуына тікелей мүдделіміз. Қазақ тілі білім мен ғылымда, медицинада, әскерде, қаржылық салада, өнеркәсіпте, ақпарат кеңістігінде өзінің лайықты орнын алуға тиіс. Мемлекеттік тіл ұлты мен ұлысына, діні мен діліне қарамай қоғамды біріктіретін күшке айналуы тиіс. Тіл мәселесінің саяси ойындар мен айла-шарғыларға айналуына жол бермейміз. ЗАҢ ЖӘНЕ ТӘРТІП Заң бәріне ортақ. Бүгінгі таңда қоғамның басты талабы елде әділдік пен заң үстемдігін орнатып, жемқорлықпен, сыбайластықпен аяусыз күрес жүргізу болып отыр. Жең ұшынан жалғасу, непотизм мен рушылдық, олигополияның, криминалдық топтардың жүгенсіздігі жүйелік сипат алғанын ашып айту керек. Соның кесірінен қоғамда әлеуметтік алшақтық пен әділетсіздік етек жайды. Біз соттың әділдігін, полицияның тазалығын, құзырлы органдардың жауаптылығын қалпына келтіру үшін осы салада түбегейлі, қатаң реформалардың жүргізілуіне, пәрменді ықпал ететін боламыз. Конституцияда кепілдік берілген адам құқығы қандай жағдайда да қорғалуы тиіс. «Тура биде туған жоқ» қағидасы судьялардың адалдығының өлшеміне айналуы қажет. Тұрмыстық және отбасылық зорлық-зомбылыққа көз жұма қарамайтын орта қалыптастыру қажет. Біз бірлесіп қоғамда жаңа құқықтық мәдениетті қалыптастыруымыз керек. ТИІМДІ МЕМЛЕКЕТТІК БАСҚАРУ «Халық үніне құлақ асатын мемлекет» тұжырымдамасы негізінде қазіргі уақытта мемлекеттік басқару жүйесінде елеулі өзгерістер жүзеге асырылып жатыр. Билік институттары заман талабына сай болуы керек. «Мықты Президент – ықпалды Парламент – есеп беретін Үкімет» формуласы сол мақсатқа жетудің баламасыз жолы. Бұдан әрі мемлекеттік басқару жүйесі ашық, түсінікті әрі қоғамдық бақылауда болуы тиіс. Қазір басқару жүйесін орталықсыздандыру үдерісі басталды. Орталық мемлекеттік органдарды оңтайландыру арқылы жергілікті атқарушы биліктің өкілеттігі кеңейді. Парламенттің, жергілікті мәслихаттардың мәртебесі мен ықпалы артты, бұдан әрі де арта түспек. Бұл аймақтардың кешенді дамуына жағдай жасамақ. Ескірген бюрократиялық әдіс-тәсілдерден, қағазбастылықтан бас тартып, мемлекеттік қызметті жаңа заман талабына лайықтау керек, цифрлық платформаны жетілдіру қажет. Біздің алдымызда ұлттық мүддені бәрінен жоғары қоя білетін жаңа мемлекеттік басқарушыларды тәрбиелеу міндеті тұр. ДАМЫҒАН АЙМАҚТАР – ҚУАТТЫ ЭКОНОМИКА Еліміздің жаңа экономикалық бағдары экономикалық еркіндік пен ұлттық табысты әділ бөлуді қамтамасыз ететін болады. Жеке меншікке қол сұқпау, ашық бәсекелестік, тұрақты заңнама бизнесті дамытуға және инвестиция тартуға жағдай туғызуы тиіс. Инновациялар мен технологияларды енгізу экономиканы әртараптандырудың негізіне айналуы тиіс. Біз ресурстарға негізделген экономикадан қосылған құны жоғары салаларға көшуді жақтаймыз. Заңдар мен халықаралық келісімдер деңгейінде ішкі нарықты қорғап, өз өндірісімізді қолдайтын боламыз. Сапалы жұмыс орны мен салық түсімінің көзі ретінде кәсіпкерлікті қолдайтын боламыз. Біз қоғамда елдің тұрақтылығы мен экономикалық тәуелсіздігінің негізіне айналатын орта тапты қалыптастыратын боламыз. Өңірлердің теңгерімді дамуын қамтамасыз ету қажет. Қазіргі уақытта жергілікті билік органдары аймақтардағы, аудан-ауылдардағы қордаланған мәселелерді шешуге толық мүмкіндік алып отыр. Ендігі кезекте еліміздегі мыңдаған әкімді ел тұрғындары, өңір жұртшылығы өздері тікелей сайлайтын болады. Іс жүзінде әкімдер мемлекеттік заңнамананың орындалуын қадағалаушы, республикалық бюджеттен келетін субсидиялардың дұрыс пайдалануын үйлестіруші әкімгерге айналады. Халықаралық, республикалық маңызы бар жол тораптарын салып, күрделі жөндеуден өткізу арқылы аймақаралық логистика мәселесін түбегейлі шешу қажет. Ауданаралық және ауыл жолдарының сапасын ретке келтіру маңызды. Шекаралас аймақтарға ерекше назар аударылатын болады. Экономиканың, еңбек нарығының дамуы үшін ішкі миграциялық үрдістерді реттеген жөн. Қандастарымызды әлеуметтендіру және экономикаға интеграциялау жұмысы қолға алынатын болады. АУЫЛ – ЕЛ БЕСІГІ Ауыл – Алаштың алтын бесігі болса, ауыл шаруашылығы Қазақстан экономикасының күретамырының бірі. Ауыл шаруашылығындағы ахуал мемлекетіміздің азық-түлік қауіпсіздігіне тікелей әсер етеді. «AMANAT» партиясы ауылдың әлеуметтік жағдайын жақсартуды, ауыл шаруашылығын қолдауға ерекше басымдық беруді мемлекеттің алдында тұрған стратегиялық міндеттердің бірегейі деп санайды. Жер иесі – ауыл адамына мемлекет тарапынан берілетін көмек пен жеңілдіктер аясы кеңейтілуі керек. Әрбір жер телімі өз мақсатына сай пайдаланылады. «Жер аманаты» жобасы аясында заңсыз жекешелендірілген немесе пайдаланылмай жатқан жерлер, жайылымдар мемлекет меншігіне қайтарылатын болады. Ауыл тұрғындарының табысын, біліктілігін арттыру, жаңа кадрларды даярлау «Ауыл аманаты» жобасы аясында жүзеге асатын болады. Барлық ауылдардың инфрақұрылымын жаңартып, жол, ауызсу, байланыс мәселелерін түбегейлі шешу кезек күттірмейтін шаруа. Ауылдардағы әлеуметтік нысандар – мектептер мен медициналық пункттер, мәдениет ошақтары жаппай күрделі жөндеуден өткізіліп жаңғыртылуы керек. Ауыл мен қала арасындағы алшақтықты барынша азайту керек. ЭКОЛОГИЯЛЫҚ САЯСАТ Өркениетті әлем елдері экологиялық мәдениетті қалыптастыруға көшті. Біз де қоршаған ортаны сақтау үшін әлемдік экологиялық жоғары стандарттарды экономиканың барлық салаларына енгіземіз. Қазақстан халқы мен келешек ұрпақ табиғи өнім, саф ауа, таза ауызсу тұтыну үшін экологиялық сана мен мәдениетті тәрбиелеуді бүгіннен бастаймыз. Экологиялық саясаттың түпкі мақсатының бірі «жасыл экономиканы» қалыптастыру. Оның аясында баламалы энергетика көздеріне эволюциялық түрде көшу, алыс болашақта көміртегінен арылу міндеті қолға алынады. Табиғи ресурстарды, өзен-көлдерді үнемді пайдалану, жануарлар әлемін, табиғи парктерді, экожүйені сақтау және қорғау – біз үшін негізгі басымдықтың бірі. ӨЗГЕРІСТЕР БІЗДЕН БАСТАЛАДЫ! «AMANAT» партиясы – еліміздегі барлық жаңару мен жаңғырудың ұйытқысы. Билік пен қоғам арасындағы алтын көпір. «AMANAT» партиясы – өзгерістер жаршысы! Біздің тұғырнамамыз жетілдірілді. Біз партияның өз ішіндегі жұмыс сипаты мен тәсілдерін жаңарттық. Партияның жаңа, жас буын кадрлары ел ісіне белсенді араласа бастады. Біз жаңа саяси мәдениет қалыптастырамыз. Ертеңгі болашаққа нық сеніммен қадам басамыз. Әділетті Қазақстанды рухы асқақ, бірлігі бекем, мақсаты айқын халқымызбен бірге құрамыз!