Шымкентте әйел күйеуінің бағалы бұйымдары мен ақшасын алып қашып кеткен
Шымкентте әйел күйеуінің бағалы бұйымдары мен ақшасын алып қашып кеткен
© azattyq-ruhy.kz
Шымкентте әйел күйеуінің бағалы заттары мен 2 млн теңгесін ұрлап кетті. Оқиға 18 қазан күні сағат 16:30 шамасында болған. Күйеуінің құны қымбат алтын жүзігі, ноутбугы мен қомақты қаржысын ұрлаған әйелі заттарды сатып, содан пайда таппақ болыпты.
«Қаратау АПБ-ның кезекші бөліміне жергілікті жердің 39 жастағы тұрғыны арызданған. Оның айтуынша, жұмыстан үйіне келген кезінде өзінің азаматтық некедегі әйелі қонақ бөлмедегі сейфтен құны 200 мың теңге тұратын алтын жүзігі мен 250 мың теңгелік ноутбугін, оған қоса 2 млн теңгесін жымқырып кеткен. Жәбірленушіге келтірілген жалпы шығын көлемі 2,4 млн теңгені құрап отыр», – деп жазады Polisia.kz.
Аталған жайт ҚР ҚК-нің 188-бабы 3-бөлігімен (Ұрлық) сотқа дейінгі тергеп-тексерудің бірыңғай тізіліміне тіркелді. Тәртіп сақшылары жүргізген жедел-іздестіру іс-шаралары барысында күдіктіні бір тәулік ішінде қала аумағынан қолға түсірді. Ұсталған әйел кінәсін толықтай мойындап, бұл заңсыз әрекетке баруына екеуара бас араздығы себеп болғанын жеткізді. Қазіргі кезде айғақты заттар тәркіленіп алынды. Тергеу амалдары жалғасып жатыр.