Ұлттық құрама шорт-тректен АҚШ-тың Солт Лейк Сити қаласында өткен әлем кубогы кезеңінде үш медаль иеленді. Жарыстың алғашқы күні Абзал Әжіғалиев 500 метр қашықтықта күміс жүлдегер атанды. Отандасымыз шорт-тректен қысқа қашықтықтағы эстафетада әлемнің үздік спортшыларының қатарына кіретінін тағы бір рет дәлелдеді. Ал жарыстың екінші күні тәжірибелі шорт-трекшінің бірі Денис Никиша 500 метр қашықтықта күміс медаль алды. Денистің көрсеткіші – 40.675. Ол іріктеу кезеңінде де, жартылай финалда да қатарынан оқ бойы оза шапты. Сондай-ақ Әділ Ғалиахметов мың метр қашықтықта қола жүлдегер атанды. Бұл – Әділдің әлем кубогы кезеңіндегі екінші медалі. Өткен жылы Бейжіңде 1500 метрде күміс жүлдені қанжығаға байлаған. Жалпы, Қазақстан ерлер құ-рамасы бес мың метр эстафеталық жарыста төртінші орынға табан тіреді. Әйелдер үш мың метрлік эстафетада алтыншы сатыға тоқтады. Оған қоса, Нұртілек Қажығали 1500 метр қашықтықта бесінші орын алып, мансабындағы үздік нәтижеге қол жеткізді. Естеріңізде болса, Монреаль қаласында өткен әлем кубогы-ның алғашқы кезеңінде ерлер құрамасы эстафетада күміс жүлдені иеленген еді. Желтоқсан айында шорт-тректен әлем кубогы кезеңі Алматыда өтеді.
Айбике ЖАНАСЫЛ