Шымкент қаласының жанындағы Бадам әскери бөлімшесінде келісімшарт негізіндегі кіші сержант А. Балғынбай кезекшілік кезінде байқатпай күзет дабылқаққышын өшіріп, қару-жарақ бөлмесінің кілтін қолға түсіріп, бірнеше қару-жарақты алып шығып кеткен. Бұл туралы ақпаратты Қорғаныс министрлігі растады. Ал, таңертеңнен бері ватсап әлеуметтік желісінде 50-ден аса суық қаруды (30 Калашников автоматы, 27 Макаров тапаншасы, 24 дана 9 калибрлі патрон, 5,45 калибрлі 420 патрон) алып кеткен сержант туралы мәлімет тарап жатыр. Ресми мәліметтерге сүйенсек, қазіргі таңда қару-жарақ сақтау бөлмесінде белгілі бір мөлшерде қару-жарақтың жетіспеушілігі анықталған. Құқық қорғау органдарының және әскери полицияның күштері әскери қызметшіні және жоғалған қару-жарақты іздестіру және ұстау үшін барлық қажетті жедел-іздестіру шараларын жүргізуде, сонымен қатар қауіпсіздікті қамтамасыз ету шаралары қабылданған. Назгүл НАЗАРБЕК