Ақтөбе облысында шағын жинақты ауыл мектептеріндегі білім сапасын арттыруға бағытталған БІЛІМ ALL жобасы басталды. Шараға облыс әкімі Ералы Тоғжанов, педагогтер мен шағын жинақты мектеп директорлары, мемлекеттік мекеме басшылары қатысты.
Облыстағы 424 мектептің 66%-ы немесе 281-і ауылдық жерде орналасқан, оның 204-і – шағын жинақты. БІЛІМ ALL жобасы 10575 оқушысы бар 120 шағын жинақты мектепті қамтиды. Бұрын аталған мектептердің білім көрсеткіші төмен болатын. Басты себеп – білікті мамандардың тапшылығы мен материалдық-техникалық базаның әлсіздігі.
«Мемлекет басшысының қолдауымен Қазақстанда балалардың жан-жақты дамуы мен сапалы білім алуына барлық жағдай жасалған. Дегенмен жасыратыны жоқ, қала мен ауыл мектептерінің білім сапасындағы алшақтыққа әсер ететін факторлар бар. Осы мәселелерді шешу үшін бірқатар шара қабылданып жатыр. БІЛІМ ALL өңірлік жобасы ауыл балаларының білім сапасын арттыруға оң әсерін тигізетініне сенімдімін», – деді облыс әкімі.
Бүгінде 114 мектепке кабинеттер сатып алу, мектеп жиһазын жаңарту, оның ішінде кітапханалар мен асханаларын жаңарту бойынша жұмыс жүргізілді. 2025 жылға дейін 282 мектеп модернизацияланбақ.
«Алға ауданындағы 29 мектептің 13-і шағын жинақты. Мәселен, біздің мектепте 58 бала оқиды. Бұл жоба білікті педагогтерден жақсы білім алуға, ал ауыл мұғалімдері үшін үлкен тәжірибе жинақтауға және біліктілігін арттыруға тамаша мүмкіндік», – деп атап өтті Алға ауданының Қарақобда мектеп-балабақшасының директоры Еркінбек Зиядинов.
Ақтөбедегі үздік нәтижеге қол жеткізген, жоғары әрі сапалы білім деңгейін көрсеткен 6 жетекші мектептің үздік 25 мұғалімі балаларды оқытады. Олардың қатарында Дарынды жасөспірімдерге арналған «Білім-инновация» мамандандырылған лицей-интернаты, М.Құсайынов атындағы дарынды балаларға арналған мамандандырылған лицей-интернаты, мамандандырылған физика-математикалық лицей-интернаты және тағы да басқа білім ордалары бар. Бір сөзбен айтқанда, математика, физика, химия, биология, ағылшын тілі пәндерінің мұғалімдері онлайн-сабақтар өткізетін болады.
«Қала мен ауылдағы білім деңгейін теңестіру мақсатында қолға алынып жатқан жобаның қатысушысы болу – үлкен мәртебе. Дарынды балалар ауылда да бар. Бірақ маман тапшылығының кесірінен олардың барлығын дер кезінде тани алмай жатамыз. Алдағы уақытта бұл жобаның ауқымы кеңейетініне сенімім мол», – деді М.Құсайынов атындағы дарынды балаларға арналған мамандандырылған лицей-интернатының математика пәнінің мұғалімі, Ақтөбе облысының үздік педагогі Нұрбек Абдуллин.
Өңір басшысы Ералы Тоғжанов ауылдық жерлерде интернет дұрысталмай, білім беру және денсаулық сақтау мәселесі толық шешілмейтінін айтты.
Бүгінде облыста 315 ауылдық елді мекеннің 216-да 250-ден астам адам тұрады. Сол 216 ауылдың тек 174-і ғана 3G интернет желісіне кеңжолақты кабельдік қолжетімділікпен қосылған. Жыл соңына дейін тағы 16 елді мекен сапалы мобильді интернетпен қамтамасыз етіледі. 250-ден аса халқы бар 10 ауыл интернетке спутниктік байланыс арнасы арқылы қосылған, оның қуаты 3G-ді еңсеруге құлықсыз, тағы 16 ауылда интернет пен ұялы байланыс жоқ, алайда, олардың кейбірі көрші елді мекендердің тұрақсыз сигналын ұстайды. Бұдан өзге, өңірде халқының саны 250-ге жетпейтін 99 ауыл бар. Соның 24 ауылында 3G стандартындағы ұялы байланыс қызметі қолжетімді.
Облыс әкімінің барлық елді мекендерді сапалы интернетпен және ұялы байланыспен қамтамасыз ету жөніндегі тапсырмасын орындау мақсатында қазір цифрлық технологиялар басқармасы жоба әзірлеп жатыр. Жоба аясында ірі байланыс операторлары кеңжолақты интернетке қолжетімділікті қамтамасыз ету үшін стационарлық байланыс желілерін салуға кепілдік береді. Салынған инфрақұрылымның арқасында ауылдарда жоғары сапалы ұялы байланысты ұйымдастыруға техникалық мүмкіндік беріледі. Цифрлық технологиялар басқармасының басшысы Әсет Отарбаев аталған жоба өңірдегі барлық өзекті мәселелерді шешуге мүмкіндік беретінін және оны жүзеге асыру үшін жергілікті бюджеттен қосымша қаражат қажет емес екенін айтты.
