Еліміздегі ауыл шаруашылығы техникалары паркін жаңарту көңіл көншітпейді, бар-жоғы 4 пайыздық деңгейде тұр. Мына қалпымызбен агроөнеркәсіп кешенінің еңбек өнімділігін өсіре алмаймыз. Бұл туралы Ауыл шаруашылығы министрлігінің алқа мәжілісінде айтылды.
Ауыл шаруашылығы вице-министрі Айдарбек Сапаровтың айтуынша, Солтүстік Қазақстан, Қарағанды, Павлодар, Түркістан облыстарында ескі техниканы есептен шығару қарқыны төмен. Ал Елбасы АӨК-тегі еңбек өнімділігін 5 жыл аралығында кемінде 2,5 есе ұлғайтуды тапсырған. Бұл тапсырманы орындау үшін бірінші кезекте аграршыларды техникалық жағынан қайта жарақтандыру қажет.
«2019 жылы ең төменгі технологиялық деңгей 6 пайыз болғанда жаңартудың орташа деңгейі 4 пайызға жетті. Қарағанды, Ақмола, Жамбыл, Шығыс Қазақстан және Ақтөбе облыстарының техниканы жаңарту деңгейі 4,3-4,6 пайыз төңірегінде. Бұл жақсы қарқын. Ал Алматы мен Түркістан облыстарында техниканы жаңартудың қарқыны төмен (2,8% және 1,8%)», – деді вице-министр. Оның айтуынша, республика бойынша есептен шығаруға жататын техника тым көбейіп кеткен. Солтүстік Қазақстан, Қарағанды, Павлодар, Түркістан облыстарында тозған техниканы есептен шығару өте баяу екен. Сондықтан озу деңгейі 80 пайызды құрайтын ескі техниканы есептен шығармай, паркті жаңарту мүмкін емес. Себебі сатып алынған техника жалпы парктің тасасында көрінбей қалады.
Тұмар МЫРЗА
