Шағым көп, жылу жоқ
Шағым көп, жылу жоқ
Биылғы жылу маусымы басталғаннан Қызылорда халқы әуре-сарсаңға түсті. Тұрғын үйлерде жылудың қысымы өте аз. Құзырлы орындар кейбір жылу құбырларынан ақау шыққанын айтып, ақталып отыр. Нәтижесінде балалар түні бойы салқын үйде бүрсең қағып шығады. Бұл – жылдағы құбылыс. Биыл Қызылордаға жылу ерте бе­рілді. Себебі, күн ерте суытты. Бұл биыл­ғы маусымда жергілікті жұртшы­лықты елең еткізген жаңалық болды. Қазан айының 5-і күні барлық нысандар орталықтандырылған жылу жүйесіне қосылатынын естіген халық қуанып қалды. Дей тұрғанмен, алғашқы күннен-ақ бір мөлтек ауданның өзінде қатар тұрған екі көпқабатты үйде жылу ала-құла берілгені көрініс тапты. Бірі жылы үйде мамыражай күн кешіп жатса, екінші біреу сыз тартқан салқын үйде бүрсең қағып отыр. Ал құзырлы орындар жөндеу жұмыстарынан қиындықтар туындап жатқанын алға тартады.
«Жыл сайын жылу маусымында осындай жүйесіздік болып тұрады. Бұл қала тұрғындарына қалыпты құбылысқа айналып тұр. Құзырлы мекемелерге әр жылда осы мәселе төңірегінде шағым­данғанымызбен еш нәтиже болар емес. Жылу берілді деген аты ғана. Қыс бойы­на үйіміз жылымайды. Жылудың қысы­мы аз. Соның салдарынан өлместің кү­йін кешіп шығамыз. Салқын үйден ба­ла­ларымыз тұмауратып, ауырып жатыр. Ал жылу ақысын төлейтін кезде қара халықты қыспаққа алады. Бұл тұрғыда қала әкімдігіне қарасты ТКШ мекемесіне айтылар сын-ескертпе көп. Бұл аздай ПИК мүлде жұмыс істеп жатқан жоқ. Алайда оған да қара халық ақша төлеуге міндетті. Мұндай бассыздыққа тосқауыл қою керек. Өз міндетін дұрыс атқармаған құзырлы мекемелерге шара қолданып, жұмыстарын бір жүйеге түсіретін кез келді», – деп ашынады қала тұрғыны Құндызай Рахимова.
Жалпы қай кезде де ПИК-тің жұ­мы­сына халықтың көңілі толмай келеді. Өйткені жыл сайын тұтынушылар дәл осындай қиындықтарға тап болады. Ал жауапты мамандар тарапынан мұны жылу құбырларынан ақау шыққанымен түсіндіреді. Осы төңірегінде жөндеу жұмыс­тарымен айналысатын мамандармен пікірлескенімізде, жылу маусымына дайындық жұмыстары назардан тыс қалмағандығын алға тартты. Алайда, құбырдан шыққан ақауларға қаржы тапшылығы қолбайлау болатынын жеткізді. Әрбір көпқабатты үйлердің тұрғындары қалталарынан ақша шы­ғарып, қажетті құрал-жабдықтарын са­тып алса, жөндеу жүргізіп беруге дайын екенін мәлімдеді. Себебі, мекеме тара­пы­нан жөндеу жұмыстарын жүргізуге ешқандай мүмкіндіктері жоқ екенін жеткізді. Егер мемлекет тарапынан та­рифтың бағасын көтерсе, барлық жауап­кершілікті өз міндеттеріне алатынын айтып отыр. Бұл жайында халық тарапынан да көп­теген сын-ескертпелер айтылып жүр.
«Қаланың сол жағалауында тұрамын. Биыл өзіміз тұрып жатқан көпқабатты үйдің жылуының қысымы өте аз. Жылу қосылды деген аты ғана. Үй өте салқын. Түнімен тоңып шығамыз. Алдағы қытымыр қыстың ызғарында жағ­дайымыздың қалай болатынын елес­тетудің өзі қорқынышты. Қала әкімдігі бұл жайттан құлағдар. Арнайы мамандар жіберіп, тексерістен өткізетінін де мә­лім­деген. Әзірге еш өзгеріс жоқ. Жылу батареялары жылымай тұр», – деп мұ­ңын шақты сол жағалау тұрғыны Ғазиза Мейрамбек.
Осы мәселе төңірегінде қала аума­ғында жылуға жауапты «Қызылорда­жылуэлектрорталығы» МКК-ға хабар­лас­тық. Онда қысқы маусымға дайындық жұмыстары өз деңгейінде жүргізілгенін мәлімдеді.
«Қазіргі уақытта қалада 18 АБМК қазандағы бар. Нақты уақытта осы қа­зан­дықтар 48-57 градус жылу қысымын ұстап тұр. Қала бойынша 764 көпқабатты үй болса, оның 200-ден астамында жылу мә­се­лесінде айтарлықтай мәселе жоқ. Ал қалған үйлерді жағдайына қарай бірнеше топқа бөлуге болады. Оның ішінде жылу құбырларына ағымдағы жөндеу және күрделі жөндеу қажеттілігі туындап тұрған үйлер бар. Бүгінде қала­дағы көптеген тұрғын үйлердегі жылу құбырларының техникалық жағдайы талапқа сай емес. Сондықтан жылу маусымы басталар кезде қала әкімдігі басшылыққа алып, ПИК мамандары жіті қадағалауға алуы тиіс. Тұрғындар бір ауыздан өздері тұратын көпқабатты тұрғын үйінің жылу құбырларын жөн­деу­ден өткізуге атсалысуы тиіс. Жылу қысымының өз деңгейінде берілмеуі сол әрбір көпқабатты үйлердің техникалық жағдайының төмен болуынан орын алады. Сондықтан жауапты мекеме­лермен бірлесіп жылу қондырғыларын жаңалау, жөндеу жұмыстарын жүргізу қажет. Өзіміздің жылу орталығынан кемшілік жоқ. Қажетті жылу өз дең­гейінде беріліп тұр. Біздің негізгі мін­детіміз – әрбір тұрғын үй аумағына ауа райына қарай тиісті температурада жылу­ды жеткізіп беру. Ал жылудың элеватор тораптары арқылы әр пәтерге таралуына тұрғындардың өздері дайын­дық жұмыстарын жүргізу қажет», – деп түсіндірді бұл жөнінде «Қызылорда­жылуэлектрорталығы» МКК бас инже­нері­нің міндетін атқарушы Бақытжан Молдиманов.
Ал облыстық энергетика және ком­муналдық шаруашылық басқармасы өңірде жылумен қамту жұмыстары тың­ғы­лықты жүргізіп жатқанын жеткізді.
«Қызылорда облысы бойынша жылу беру маусымы ағымдағы жылдың қазан айының 4-11 аралығында басталды. Қа­зіргі уақытта 1064 әлеуметтік нысандар және 845 көпқабатты тұрғын үйлер орталықтандырылған жылу жүйесіне қосылған. Негізінен жылу беру маусы­мына қажетті 176,2 мың тонна көмірдің 158 мың тоннасы жеткізілді. Оның ішін­де тұрғындарға 128 мың тонна, әлеу­мет­тік нысандарға 30 мың тонна алынды. Қазіргі уақытта облыс бойынша 280 әлеу­­меттік нысан сұйық отынмен жы­лы­­тылады. Жылу маусымының тұрақты өтуі облыс әкімдігінің бақылауында», – деп түсіндірді басқарма.
Осы орайда Қызылорда қаласы әкім­дігіне қарасты тұрғын үй-коммуналдық шаруашылығы, жолаушылар көлігі және автомобиль жолдары бөліміне осы мәселе төңірегінде хабарласып көрдік. Алайда, аталмыш бөлім тарапынан қала аумағындағы жылу мәселесіне байла­нысты тұшымды жауап бере алмады. Қалай дегенде де, сыз тартқан сал­қын үйде бүрсең қағып отырған халықты құзырлы орынның «бәрі ойдағыдай» деген жауабы қанағаттандырмайтыны анық. Жылу маусымына жүрдім-бардым қарауға болмайтынын қаперде ұстаған абзал.

Қызылорда облысы