Шығыс Қазақстан облысында сүңгуірлер мұз астына түсіп кеткен әйелдің денесін тапты, – деп хабарлайды облыстық Төтенше жағдайлар департаменті. «8 желтоқсанда түскі уақытта әйелдің денесі табылды. Барлығы 9 рет су астына түсу жұмыстары жүргізілді. Судың тереңдігі – шамамен 20 метр. Іздеу жұмыстарына жеке құрамнан 23 адам мен 7 техника жұмылдырылған, – делінген ақпаратта. Сүңгуірлерге марқұмның денесін жылдам табуға ауаның төмен температурасы мен су астындағы қараңғылық қиындық келтірген. Еске салсақ, осыған дейін ШҚО-да бес адам мінген көлік мұз астына түсіп кетіп, бір жолаушы көз жұмғаны хабарланған. ШҚО Төтенше жағдайлар департаменті баспасөз қызметінің мәліметіне сүйенсек, 6 желтоқсан күні сағат 19:44 кезінде Самар ауданындағы Бұқтырма су қоймасында 5 адам отырған көлік мұз астына құлаған. Төртеуі көліктен шығып үлгеріп, 1950 жылы туған әйел адам суға батып кеткен.