Қазақ үні әлемді аралап жүр. Димаш бастаған көшті Данэлия мен Ержан жалғап, эстафетаны Индира мен Ерланға тапсырды. «Украина дауысы» жобасының жабық тыңдалымына қатысқан Алатаудың қос таланты көрермен жүрегін жаулап алды.
Қазылар алқасы да Индира Еділбаева мен Ерлан Байбазаровтың өнеріне тәнті болды. Dan Balan, Monatik, Тина Кароль, Потап пен Настя Каменскилер оларға жоғары баға берді.
Алғашында Украина додасында алматылық Ерлан Байбазаров бақ сынады. Feel It Still әнін домбырамен орындаған оған Тина Кароль бірден бұрылды. Домбыра үнін заманауи құралмен үндестірген Ерланның орындауы әсерлі шықты. Алмалы қалада такси жүргізушісі болып еңбек ететін ол Потап пен Настяның тобын таңдады. Олармен бірге ән шырқағысы келетінін, болашаққа деген айқын жоспары барын жеткізді. Monatik болса Каменскилерге Ерланның талантын одан ары шыңдап, екінші Ed Sheeran болуына ықпал жасауын өтінді.
Ал Еділбаева «Мелодія» әнімен құлақ құрышын қандырды. Тәлімгердің бәрі бірден таңдау түймешесін басып, Индира болмысына баға бергісі келді. Туындыны сызылта, құбылта, өн бойына ене отырып орындаған оған көрермен тұрып қол соқты. «Анамның сенімін ақтаймын» деген әнші Dan Balan-ды таңдады. Алматылық ару имене жауап қатып, сахнада көз жазына ерік берді. Мұндай нәзік әрі қуатты дауыстың астында сезімтал жүректің барын аңғарған тәлімгерлер Индираға сәттілік тіледі.
А.ЖАНАСЫЛ
