Бүгін және ертең елордада І Орталық Азия медиа форумы өтеді. Оған көрнекті мемлекет және қоғам қайраткерлері, беделді сарапшылар мен медиа мамандар, халықаралық деңгейдегі белгілі ғалымдар, саясаткерлер, журналистер қатысады. Жүзден астам спикер бас қосатын іс-шара аясында медиа мамандар мен танымал сарапшылар өңірлік бірегейлік, жаңа медианы дамыту, жасанды интеллект технологияларын медиада қолдану, Орталық Азиядағы креативті индустрияның дамуы, ортақ сериалдар мен анимациялар жасаудың маңызы, пост-шындық кезеңіндегі ақпараттық қауіпсіздік, медиа саласындағы білім беру транформациясы, өзара ынтымақтастықтағы халықаралық ұйымдардың орны, азаматтық қоғамды дамытудағы гендерлік теңдіктің рөлі, өңірлік және жаһандық кооперация мүмкіндіктері сияқты көкейкесті мәселелер талқыланады.
«Форум қонағы ретінде елімізге алғаш болып Түркияның 11-президенті Абдулла Гүл мен Моңғолияның 3-президенті Намбарын Энхбайар аяқ басты. Олардың медиа форумға арнайы шақырылуының өзіндік мәні бар. Мәселен, Моңғолияның бұрынғы басшысы Намбарын Энхбайар журналистикадан жетіліп шыққан қайраткер тұлға болса, Түркияның экс-президенті Абдулла Гүл – фотожурналистикамен әуестенетін, жаңа медиаға жаны жақын азамат», – дейді Ақпарат және қоғамдық даму министрі Дархан Қыдырәлі.Іс-шараның хэдлайнері – қазақ қызы, бүркітші Айшолпан жайлы жазылған Eagle Huntress кітабының авторы Лиз Уелш, YouTube желісінде 18 миллиард қаралым жиған дүние жүзіндегі балаларға арналған ең танымал dBillions жобасының авторы Ернис Уметалиев, сондай-ақ Пулитцер сыйлығының иегерлері болғалы отыр. Сонымен қатар танымал қазақстандық әнші Димаш Құдайберген БҰҰ резолюция арқылы бекіткен 21 қыркүйектегі «Халықаралық бейбітшілік күнінің» және әлемдік Peace one day жобасының авторы Джереми Гиллимен бірге бейбітшілік идеясы бойынша арнайы сессия өткізеді.
Азат ҚАЗАҚ