Алматы облысының судьясы алаяқтық жасағаны үшін бес жылға сотталды. Ол енді өмір бойы мемлекеттік қызмет атқара алмайды. Бұл туралы Aikyn.kzЖетісу облыстық сотының баспасөз қызметіне сілтеме жасап хабарлайды.
Талдықорған қалалық сотында Алматы облысы бойынша МСЭҚК судьясы Алмакүл Түменбаеваға, кәсіпкер П.-ға, сондай-ақ делдал А. мен Ж.-ға қатысты қылмыстық іс қаралды.
Zakon.kz-тің дерегінше, Алмакүл Түменбаеваға алаяқтық жасады деген айып тағылды. П. жауапты мемлекеттік қызмет атқаратын адамға делдал арқылы қомақты мөлшерде пара беруге әрекеттенген. А. мен Ж. пара алу бойынша делдалдық істеген.
Сот Түменбаеваның медиаторлар Ж. және Т.-ға көрінеу жалған ақпарат бергенін, оған сәйкес, Алматы облыстық сотының апелляциялық сатысында оның шешімін өзгеріссіз қалдыруға ықпал ете алатынын анықтады.
ЖШС директоры П. делдал арқылы қомақты сомада 3 миллион теңге көлемінде пара бермек болған. А. мен Ж. өз кезегінде медиатор ретінде әрекет етті.
«Сот Алмакүл Түменбаеваны алаяқтық, алдау және сенімге қиянат жасау арқылы бөтеннің мүлкін иемдену әрекеттерін жасағаны үшін кінәлі деп танып, мемлекеттік қызметте лауазымдарды атқару құқығынан өмір бойына айыра отырып, 5 жылға бас бостандығынан айыру жазасын тағайындады» делінген ресми хабарламада.
П. кінәлі деп танылып, оған мемлекеттік қызметте лауазымдарды атқару құқығынан өмір бойына айыра отырып, 3 жыл 6 айға бас бостандығынан айыру жазасы тағайындалды. Т. және Ж өмір бойына мемлекеттік қызметте лауазымдарды атқару құқығынан айырумен 1 жыл 6 айға бас бостандығынан айырылды.
А. мен Ж. рақымшылыққа сәйкес жазадан босатылды. Соттың үкімі заңды күшіне енген жоқ.
19 желтоқсанда Сыбайлас жемқорлыққа қарсы қызмет Жоғарғы соттың ішкі қауіпсіздік департаментімен бірлесіп, 1,5 миллион теңге пара алған Алмакүл Түменбаеваны заңсыз әрекетін әшкереледі.
