Кейінгі жылдары Алматы облысының халқы күрт өсіп, 2 миллионнан асып жығылды. Тұрғындардың 180 мыңға жуығы облыс орталығы Талдықорған қаласында тұрады. Жетісу өңірі бас шаһары облыс орталығы мәртебесін қайта иеленген 2001 жылы мұнда 130 мың халық тұратын. Содан бергі 19 жылда тұрғындар саны 50 мыңға артып, 180 мыңға жетіпті. Соған сай Талдықорған қаласының іргесі кеңіп, жаңа шағынаудандар мен әлеуметтік-мәдени нысандар да қатар бой түзуде. Былтыр олардың қатарына өзіндік ерекшелігі бар коттеджді қалашық қосылды.
Биыл да құрылыс қарқыны бәсеңсімейді. Кейіннен пайда болған 8- шағынауданда барлығы 782 пәтерден тұратын 24 көпқабатты үйдің құрылысы басталып, жетеуі жыл соңына дейін қолданысқа беріледі деп жоспарланыпты. Сонымен бірге осы шағынауданда кезекті білім беру нысаны – 1 200 орындық мектеп салынады. Инвесторлар да Талдықорғанға қаржы салуға құштар. Олар «Шығыс» шағынауданында 726 пәтерлік 22 көпқабатты үйдің құрылысын жүргізбек.
Былтыр коттеджді қалашықта 155 жеке үй салынып, оның негізгі бөлігі көпбалалы аналарға берілді. Тұрғын үй кезегінде жылдап тұрғандар да баспаналы болып, осы қалашықтан жеке үй алды. Оқу жасындағы балалар саны да көбейгенін, олардың қаланың басқа аудандарына қатынап, білім алуы ата-аналар үшін қиындық туғызатыны ескеріліп, қалашықта 900 орындық заманауи мектеп пен 280 орындық балабақша тұрғызылады. Облыс әкімінің тапсырмасымен қалашық аумағы толық абаттандырылып, көгалдандырылып, жасыл желекке бөленеді. Балаларға арналған екі ойын және футбол алаңы жабдықталады. Әзірге сырт көзге сиықсыздау болып көрініп тұрған коттеджді қалашық бірер жылда көрсе көз тоятын дәрежеге жетеді деген үміт мол. Жетісу мемлекеттік университеті студенттеріне арналған жатақхананың ғимараты мен жабық жүзу бассейні де биыл бітеді.
Қаланың тұрғындарға қолайлы болуы да ойластырылуда. Соңғы жылдары бітпес жырға айналған жолаушылар тасымалы да жөнге келтірілмек. Жеке тасымалдаушыларды субсидиялау тетігін пайдалана отырып, қалалық жолаушылар тасымалы көліктері толығымен жаңартылады. Жайлы автобус сатып алынып, қызмет сапасы мен қауіпсіздігін қамтамасыз ету үшін талаптар күшейтіліп, электронды билет жүйесі енгізілмек.
Болат АБАҒАН,Алматы облысы
