Бұл жөнінде Әшағаңның: «Екі тілде шығатын журнал аштық. Менің алдымда «Арайды» оқырманы көп, беделді журналға айналдыру мақсаты тұрды. Ол үшін талантты жастарды іріктеп алдық. Солардың алдыңғы легінде Әділбек Қаба болды. Ол журналда жүріп өзін көрсете білді. Қандай тақырыпты алса да терең зерттеп барып жазатын ойы ұшқыр, сөзі өткір, қаламы жүйрік журналист ретінде танылды», – деп айтқаны бар.Оның қабілетін тани білген белгілі жазушы, «Жас Алаш» газетінің бас редакторы Уәлихан Қалижан аттай қалап, қызметке шақырады. Ол жылдары «Жас Алаш» газетінде небір талантты жастар, білікті журналистер жұмыс істейтін. Таралымы көп, оқылымы жоғары, беделі зор басылым болатын. Қазақ журналистерінің шыңдалу мектебі болған басылымда Әдекең 16 жыл табандап қызмет атқарды, тілшіліктен жауапты хатшы, бас редактордың орынбасарына дейін көтерілді. Газеттің белсенді журналисі бола жүріп, «Мыңнан бір мезет» қосымшасын ашып, оны 12 жыл бойы шығарып келді. Таралымы 130 мыңға дейін жеткен қосымша республикадағы өте беделді басылым болумен қатар, оқырманның сырлас серігіне айналды. Әдекең онда жарияланған ең таңдаулы материалдардан «Мыңнан бір мезет», «Қасиет» атты кітаптарын жарыққа шығарды. Әдекеңнің одан кейінгі журналистік жолы бірыңғай басшылық қызметке ұласты. «Айқын» газетінде бас редактордың бірінші орынбасары болып, ұзақ жыл жемісті еңбек етті. Талантты адам қай қызметте де өзін жан-жақты көрсете біледі емес пе?! Әдекең де сондай сан қырлы, бір сырлы азамат. 2009 жылдан кейін Әділбек Қаба мемлекеттік қызметке ауысты. Шығармашылық жұмыста да, редакторлық басшылық қызметінде де ізденгіш, бастамашыл, еңбекқор, іскер, жаңашыл және табанды болса, мемлекеттік қызметте де ұйымдастырушылық қабілет-қарымының және зеректігінің арқасында биік белестерді бағындырды. Бас прокуратурада басқарма басшысы, Парламент Сенатында баспасөз қызметінің басшысы, бөлім меңгерушісі, Мәдениет және спорт министрлігі Тіл комитеті төрағасының орынбасары, комитет төрағасы қызметтерін жемісті атқарып, жетістіктерге жетті. Әдекеңнің өлең жазатынын «Жас Алаш» газетінде бірге қызмет атқарған кезде білетін едім. Ал оның ақындық қырын білетіндер аз еді. Өйткені ол өлеңдерін мерзімді баспасөзге берген емес. Тек жақсы бір отырыстарда реті келіп қалғанда не болмаса шабыты оянған кейбір сәттерде өлеңін оқитыны бар-тын. Ойлы, сезімге бай, образға құрылған, рухты жанитын жырлары бізді бір серпілтіп тастайтын. «Әдеке, өлеңдерің жақсы, газеттерге берсеңші» дегенімізге «ақын емеспін ғой» деп жымиып қана жауап қататын. Сонымен, бұл әңгімеге нүкте қойылатын.
Бір жылы жазғы демалыс кезінде жолымыз түсіп, Кегендегі Құрманжан құдамыздың үйіне бардық. Кешкісін әңгіме-дүкен құрып, ауыл-аймақтың жай-күйін сұрастық. Әлден соң Құрманжан аға «Сен оны танитын шығарсың, қазір атын ұмытып тұрмын, бір ақынның өлеңін «Жас Алаш» газетінен оқыдым. Өлеңдеріне қарағанда өзі біздің жақтан болуы керек», – деді. Ақынның атын есіне түсіре алмай, біраз қиналды. Сосын барып газетті іздеп тапты. Ағамыз аузынан суы құрып, өлеңдерін тамсанып айтып отырған мықты ақынымыз – Әділбек Қаба болып шықты.«Жас Алаш» Әдекеңнің бір топ өлеңін жариялапты. Шынында да, оқыған сайын рухты жырлар жан дүниемізді баурап алды. Отты жырларды оқыған үстіне ағамыз «қалай жазады ә, қалай дәл суреттейді» деп қатты разы болып отырды. Әдекеңнің рухты жырлары сонау ауылдағы ойлы оқырман жүрегін жаулағанына сол жолы өзім де іштей сүйсіндім. Әдекең республикалық бірнеше газетте басшылық қызметте жүрсе де, кейіннен мемлекеттік қызметтің қыруар жұмысына бас қойып кетіп, қаншама уақытын қоғам ісіне арнаса да, Құдай берген талантын аялай біліпті, жырын одан әрі ширықтыра түсіп, қаламын ұштай беріпті. Өзін-өзі шарболаттай қайрай беріпті. Соған шүкір дейміз. Әділбек Қабаның сыршыл өлеңдері, мазмұнды әңгімелері әлеуметтік желі арқылы қалың оқырман жүрегін жаулап алғанын ерекше атап өтуіміз керек. Жақында жарық көрген «Қабір қазған» атты аудиокітабын он күнде жарты миллионға жуық оқырман оқыпты. Бұл Әдеңнің шығармашылық қуатын ғана емес, шығармасының оқырман көңілін жаулап алған өміршеңдігін көрсетсе керек. Әйтпесе, онсыз да уақыт жетіспейтін қазіргі кезде соншама оқырманды өзіңе тарту, шығармаңа тәнті ету – айтқанға ғана оңай. Әдекең журналистік, басшылық қызметінде талай жастың жолын ашқан, ақыл-кеңесін беріп, қабілет-қарымын дер кезінде бағалап, тура жол нұсқаған, қажет кезінде қолдау көрсетіп отырған тағылымы мол тәлімгер! Сол көп шәкірттерінің бірі болғанымды әрдайым мақтан етемін. Адамгершілігімен, ақжарқын көңілімен, кішіпейіл мінезімен, кеңдігімен, көпшілдігімен, Алатаудай арқасүйер ағамыз болып кеткен Әділбек Күнесханұлына деген інілік ізетіміз, құрметіміз қашанда ерекше! Алпыстың асқарына көтерілген Әдекең жастық күш-жігерін ғана емес, зымырап өткен қаншама жылын баспасөзге және мемлекеттік қызметке арнады, бойындағы бар қуатын салып, сығып сөлін берді десек, артық айтпағанымыз. Шерағаң айтпақшы, «алпыс – тал түс» атты белеске арқалы ақын, жампоз журналист, арлы азамат дәрежесіне үлкен абырой-беделмен жетіп отыр. Алда алар асулары қаншама?! Әдекеңнің Қаба деген тегінің өзінде үлкен мән-мағына бар. «Қаба сөзі – моңғол тілінен аударғанда ағыны қатты көп су тамшылары бар дегенді білдіреді» (nina.kz) дегенді оқыдым. Шындығында да, Әдекең ешқашан орта жолда тоқтап қалған емес, қандай қиындық болсын ақылымен, сабырымен, өмірлік мол тәжірибесімен еңсеріп келеді. Ата-бабасынан тұла бойына дарыған асыл қасиет, ата-анасынан алған тәлім-тәрбие Әдекеңді ел қадірлеген, көпшілік құрмет тұтқан азамат деңгейіне жеткізгені анық. Ендігі алтын уақытын жазуға, кемеліне келген қабілетін жырларымен сусындайтын Құрманжан ағамыздай зерделі оқырмандар игілігіне арнайтын шығар деген үміттеміз. Қарымды қаламгерді алдағы уақытта шығармашылық биіктен көруді жазсын.
Нұрлан ҚАЛҚА, ақын, халықаралық «Алаш» әдеби сыйлығының лауреаты