"Баласы төсін тістеп алған": туыстары екі балалы әйелдің өліміне дәрігерлерді кінәлайды
"Баласы төсін тістеп алған": туыстары екі балалы әйелдің өліміне дәрігерлерді кінәлайды
Фото: "МОЙ Город"
24 жастағы оралдық Асылтас Әренова 2,5 және 1 жасар екі баланың анасы еді. Жақында Асылтастың кеуде тұсы ауырсынып, түйін пайда болған. Артынша тіпті қолын көтере алмай қалған. Асылтастың туыстары ол дәрігерге жүгінгенін, бірақ олар уақытылы көмек көрсетпегенін айтады, – деп хабарлайды Massaget.kz  "МОЙ Город" сайтына сілтеме жасап. 
"Дәрігерлер оған қараған жоқ, тіпті кеуде тұсындағы түйінді көрмеген. Бастапқыда ол жедел жәрдем шақырып, содан кейін қалалық көпсалалы ауруханаға жүгінді, ол жердегілер Асылтасты жұқпалы аурулар ауруханасына жіберіп, ақыры облыстық ауруханадан бір-ақ шыққан. Барлық жерде анализ тапсыртып, үйіне қайтарған. 27 ақпанда оның жағдайы нашарлап, жансақтау бөліміне түсіп, 17:00 шамасында Асылтасымыздан айырылып қалдық", – дейді марқұмның туысы.
Қайғылы оқиғадан кейін марқұм әйелдің денесі зерттеуге жіберілген. Бірақ оның нақты өлім себебі тек екі аптадан кейін белгілі болады екен. Асылтастың туыстары дәрігерлер шұғыл көмек көрсетпегеніне наразы.
"Кіші баласы еміп жатқан кезде оның омырауын тістеп алған. Солай жара пайда болған, ол біртіндеп үлкейе бастаған. Ақыры бүкіл денесіне тарап кеткен. Дәрігерлер Асылтастың денесін көрсе қандай да бір белгіні көрер еді ғой. Ол өз аяғымен көмек сұрап барды ғой. Дәрігерлер ауырсынуды басатын дәрі ғана берген. Жасы небәрі 24-те еді ғой, 25 жасын мейрамханада атап өткісі келген еді. Оның балаларына не айтамыз? Олардың көзіне қалай қараймыз? Олар әлі кіп-кішкентай ғой", – дейді марқұмның туысы Нәсіп Сәуленова.
28 ақпанда Асылтасты туыстары ақтық сапарына шығарып салды. Марқұмның жаназасына туыстары мен жақындары келген. Олар болған жайтқа сене алар емес. Облыстық денсаулық сақтау басқармасының баспасөз қызметі өкілдері өлімнің нақты себебі мәйітті ашып, зерттегеннен кейін ғана анықтауға болатынын айтқан. Басқармадағылар өзге ақпаратты алдағы уақытта жариялауға уәде берді.