Қазақстандық теннисші, Уимблдон-2022 чемпионы Елена Рыбакина еліміздің жас теннисшілеріне қолдау көрсетіп, 2,5 млн теңгеден берді. Бұл туралы Қазақстан теннис федерациясы хабарлады.
Елена Рыбакина «Уимблдон-2022» жеңісінен кейін жүлде қаражатының бір бөлігі отандық жас теннисшілерді қолдауға бағытталатынына уәде берді.
Бұған дейін Елена Астанада қаңғыбас иттер орталығы «СтопОтлов» еріктілер қозғалысына ақша аударған еді.
Ал келесі күні чемпион қазақстандық жас теннисшілерге қолдау көрсетіп, олардың болашақта үздік ойыншы болуға ұмтылуына қаражат бөлді.
Е.Рыбакина жас теннисшілерді өзі таңдап, нәтижесінде 14 ойыншы 2,5 млн теңгеден алды. Олардың қатарында Линара Бөлешева, Полина Барабанова, Амина Нұрахан, Ариана Гогулина, Сатима Төреген, Ева Карышева, Альбина Кәкенова, Аружан Арыстанбекова, Дана Байдәулет, Іңкәр Дүйсебай, Айя Нүпбай, Полина Слепцова, Сандуғаш Кенжебаева және Зара Даркен бар.
Сондай-ақ, жас теннисшілер Еленаға хат жазып, аталған спортқа келу тарихы туралы айтып берді.
«Менің ойымша, жас теннисшілер арасында турнир ұйымдастырып оларға гранттар тағайындау дұрыс болар еді. Өйткені, мен бір кездері Қазақстаннан үлкен қолдау таптым. Енді жас ұрпақтың дамуына көмектесу менің кезегім», – деген болатын Елена Рыбакина Уимблдонда жеңіске жеткеннен кейін.
