Сапар барысында депутаттар балаларға қажетті жағдай жасалуына баса көңіл бөлуде. Олар ғимараттардың сыртқы және ішкі жайына, шатырлары мен оқу сыныптарының, спорт залы, акт залы мен асхана блогының жағдайын жіті бақылауда. Облыстық ПД-нің ЖБО-на ақпарат беретін турникеттер мен бейнекамералардың болуына, еңбек бойынша шеберханалар мен нақты пәндер (химия, физика, биология) кабинеттерінің жабдықталуына назар аударылды. Бұл тұста оқу орындарындағы мәселелер ауқымы кең екенін айта кету керек. Жылыту жүйелерін күрделі жөндеу, шатыр мен электр сымдарын ауыстырудан бастап спорттық жабдықтармен жабдықталу деңгейіне дейін шешуді талап ететін мәселелер бар. Мысалы, №26 орта мектепте жылу жүйесі өте қиын жағдайда, ал №23 орта мектепте электр сымдарын толығымен ауыстыру қажет. Мектеп директорларының барлығы дерлік көшедегі спорт алаңдарын жаңарту қажеттілігі туралы баяндады. Кейбір мектептердегі ой салатын тағы да бір мәселе – акт залдары мен асханалардың біріктірілуі, бұл оқу орындарының жұмысында белгілі бір қиындықтар туғызатыны сөзсіз.
Облыстық мәслихат депутаттары тәрбие үрдісіне, психологтер кабинеттерінің жұмысына, темекі шегудің және электронды темекіні (вейптерді) пайдаланудың алдын алуға ерекше назар аударуда. Кездесулер барысында педагогтер өз ұсыныстарын жеткізді. Олардың айтуынша, мектеп бағдарламасына жеке пән ретінде сызу сабақтарын қайтару – өзекті мәселелердің бірі. Тексеру қорытындысында барлық жалпы білім беретін мектепке бақылау жұмысының қорытындысы бойынша талдау жасалып, бірінші кезекте шешілуі қажет мәселелер айқындалмақ.
Нұрлан ОРАЗҒАЛИЕВ