Сайлауалды бағдарламаға енген барлық нысанға партиялық бекеттер орнатылып, құрылыстың уақытылы, әрі сапалы орындалуы ерекше назарға алынған. «AMANAT» партиясы жаңа мәдени нысандардың инфрақұрылымын құруға және дамытуға ықпал етуде.
Мәселен, қалалық партиялық бақылау комиссиясының мүшелері «Нұрсәт» ықшамауданында салынып жатқан оқушылар сарайының құрылыс жұмыстарын тексерді. Нысанның құрылысы 2021 жылдың аяғында басталып, қазір толық біткен. Маусым айында пайдалануға берілмек. 500 оқушыға лайықталған оқушылар сарайы 3 қабатты, 3 блоктан тұрады. Атап айтқанда, ғылыми-техникалық, спорттық сауықтыру бағыты, үлкен және кіші бассейндері бар. 4 ауысымда жұмыс істейтін сарайда 7-18 жас аралығындағы 2000 баланың түрлі үйірмеге қатысуына мүмкіндігі бар. Көлік тұрағы мен 35 адамдық асхана да назардан тыс қалмаған.
Партиялық бақылау комиссиясының төрағасы Ғани Ташқараев бастаған партия мүшелері мен БАҚ өкілдері балалар тұлғасының шығармашылық, спорттық, ғылыми, мәдени әлеуетін дамытуға арналған ғимарат құрылысы жұмыстарының сапасын зерделеп шықты.
Айта кетейік, партияның қалалық филиалы жанынан құрылған аталмыш комиссия өткен апта үш ауысымда білім беретін №65, №8, №45 мектептердің қосымша құрылыс жұмыстарын бақылап қайтқан болатын. Үшінші мегаполисте үш ауысымды мектеп мәселесі биыл толық шешімін табатын болады.
Назгүл НАЗАРБЕК,
Шымкент қаласы