Атап айтсақ, кеше Санжар Тәшкенбай финалға шықты. Қазақстандық боксшы 48 келіге дейінгі салмақта Ресейдің төрт мәрте чемпионы Эдмонд Худоянмен қолғап түйістірді. Тартысты өткен бәсекеде Санжар басым болды. Есеп 5:0, Санжар Тәшкенбайдың пайдасында.
Ізін суытпай жеңісті жолды Махмұд Сабырхан жалғастырды. Ол жартылай финалда әлем чемпионы, кубалық Йосвани Вейтиямен жұдырықтасты. Бірінші раундта бес төреші түгел қазақстандық боксшы басым деп тапты. Екінші кезеңде төртеуі Махмұдқа ұпай берді. Қорытынды есеп – 5:0.
Жартылай сыннан сүрінбей өткендердің қатарын Дулат Бекбауов толықтырды. Қазақстандық боксшы 67 келіге дейінгі салмақта грузиялық Лаша Гурулимен шеберлік байқасты. Бірінші кезеңде төрешілердің бәрі Дулат басым деп тапты. Екінші раундта да солай болды. Қорытынды есеп – 5:0, жекпе-жек Дулаттың пайдасына шешілді.
Боксшыларымыз осы қарқынынан таймаса, Ташкенттен алтын толы қоржынмен қайтуымыз әбден мүмкін. Бокс туралы жазатын шетелдік Tooslick222 Twitter аккаунты Қазақстан әлем чемпионатында қанша алтын медаль жеңіп алатынына болжам жасапты. Шолушының пікірі бойынша, Қазақстан құрамасы бұл тартысты бәсекеде екі алтын медаль жеңіп алады. Ал олардың иесі Санжар Тәшкенбай (48 келі) мен Махмұд Сабырхан (54 келі) болады деп атаған.
Бет қатталып жатқанда:
71 келі салмақ дәрежесінде сынға түсіп жатқан ұлттық құраманың капитаны Асланбек Шымбергенов жартылай финалдық бәсекеде үндістандық Дев Нишантты 3:2 есебімен жеңіп, ақтық жекпе-жекке жолдама алды.Сондай-ақ 80 келі салмақта шаршы алаңға шыққан Нұрбек Оралбай Олимпиада ойындарының қола жүлдегері Имам Хатаевты 4:0 есебімен жеңіп, ақтық сынға жолдама алды. Осылайша, кешегі күн қазақ боксының жарқын болашағын көрсетті.
К.ЕСІМ