Жыл соңына дейін құрылысы ұзаққа созылған үйлердің саны қысқарып, үлескер саны анағұрлым азаймақ. Бұл туралы Астана қаласының әкімі Жеңіс Қасымбек тұрғындармен кездесу барысында айтты.
Елордадағы проблемалы үйдің жағдайы әртүрлі. Бірінің тек шұңқыры ғана қазылса, екіншісінің қаржылық аудит, жобалық-сметалық құжаттары толық емес. Бұдан бөлек бір пәтерлерді алаяқтар бірнеше қожайынға сатса, қаңқасы тұрғызылған кейбір үйлер апатты күйде болатын. Қазір әкімдік ұзаққа созылған мұндай нысандардың құрылысын басты назарда ұстап отыр. «Зере-2», «Араби 2 - Гранитный 2», «Мирный дом», «Коргалжинский квартал» секілді құрылысы ұзаққа созылған проблемалы нысандарды аралап шыққан шаһар басшысы олардың әрқайсысының өткен тарихы әртүрлі екенін жеткізді. Олардың арасында өз пәтерін 10 жылдап күтіп жүрген тұрғындар да бар. Сондай-ақ кейбір нысандардың құрылысы кестеден қалып барады, ал енді бір жерінде құрылыс сапасына көңіл толмайды. Сондықтан құрылысы ұзаққа созылған нысандардың үлескерлерімен кездесіп, мән-жайды түсіндірген қала әкімі: «Осыдан үш жыл бұрын қалада 16 мыңдай үлескер болған. Қазір олардың үштен екісі тиесілі пәтерлерін алды. Өкінішке қарай, «Фемида» тұрғын үй кешені сияқты құқық белгілейтін құжаттары толық берілмеген нысандар бар. Сонда биылға шамамен 3,6 мың үлескер қалып отыр. Олардың бәріне жыл аяғына дейін үйлерін салып, кілттерін табыстауымыз керек», – дейді.
Өз кезегінде құрылыс салушылардың мойнында жұмыс қарқынын арттыру, құрылыс маусымын барынша пайдалану, сол сияқты сапаға ерекше көңіл бөлу міндеттері тұр. Жылу беру маусымына дейін нысандар жылу жүйесіне қосылып, құрылыс салушылар қатардағы жай нысан ретінде қарастырмауды ойластыру маңызды. Өйткені өз пәтерін жылдар бойы күтіп жүрген жандар жайлы баспанада өмір сүріп, ертеңгі өмірінің жарқын боларын сезіну қажет.
Ж.МҮСІЛІМ