Форумға Батыс Қазақстан облысы әкімі Нариман Төреғалиев пен Іскер әйелдер қауымдастығының президенті Раушан Сәрсембаева, белгілі ақын Ақұштап Бақтыгереева, Әйелдер және отбасы-демографиялық саясат бойынша Президент жанындағы ұлттық комиссия төрағасының орынбасары Елена Тарасенко қатысуда.
– Баршаңызды халықаралық отбасы күнімен құттықтаймын. Мемлекеттің басты саясаты отбасы құндылығын, ана саулығы мен бала амандығын нығайтуға бағытталып отыр. Бұл күн – ерекше мереке. Біздің елімізде кәсіпкерлік кең көлемде дамып келеді. Соның ішінде әйелдердің бизнестегі санын көбейту бағытында да жұмыстар атқарылуда. Облыс бойынша бизнестегі қыз-келіншектердің саны 50 пайыздан асып отыр. Облыстағы сән салондары мен тігін цехтарын айтпағанда кейбір ірі кәсіпорындар мен жеке балабақшалардың жұмысын әйелдер жүргізіп отыр. Сіздер тазалық пен мейірімнің үлгісі болып қала бересіздер. Әр бастамаларыңызға сәттілік тілеймін, – деді форумда сөйлеген облыс әкімі Нариман Төреғалиев.
Форумға облыстағы ірі кәсіпкерлік нысандарының жетекшілерімен қатар кәсібін енді бастаған жас кәсіпкер қыз-келіншектер де қатысты.
«Іскер әйелдер қауымдастығының мақсаты – жұмыс жүргізе білетін, көшбасшы, іскер әйелдерді көрсету, таныту, біріктіру. Бүгінде республика бойынша 5 мыңнан астам әйел қауымдастықпен жұмыс істеп отыр. Еңбек ете білу, оның нәтижесімен бөлісу біздің әйелдердің қолынан келеді. Біз жастарды оқытып, үйретіп бір отбасыдай еңбек етіп келеміз», – деді Раушан Сейсембаева.
Форумға көршілес Атырау, Ақтау және Алматыдан кәсіпкер әйелдер келді.
«Бизнес әлемінде әйелдерге қолдау өте қажет. Әсіресе, отбасының қолдауы аса маңызды. Бізде әйелдер отбасылы болғандықтан кейде қиындыққа тап болып жатады. Күндіз-түні жұмыс дегенді түсініп, қолдау білдіретін отбасы тірек бола білу керек. Әйелдердің бизнес әлемінде жетістікке жетуі үшін жақсы орта керек. «Жеңілме, берілме, алға» деп отыратын кәсіпкер құрбылары көп болу керек. Бизнесте әйелдер бір-біріне бәсекелес емес, қолдаушы бола білсе жетістік те көп болады», – дейді Жұлдыз Кивашева.
Оның өз би студиясы бар. Ол жерде 3-5 жастағы балалар жаттығады.
Форум мерекелік кешке ұласты.
А. ХАСАН