Étage дизайн студиясы дайындап, «Шеврон» компаниясының қолдауымен жарыққа шыққан кітаптың бірнеше ерекшелігі бар. Біріншіден, кітап қазақ және орыс тіліндегі екі нұсқада жарық көріп отыр. Орыс тіліндегі нұсқасы «Тайны страны гор и степей» деп аталады. Екіншіден, кітап балаларға Қазақстанның алуан айшықты табиғат байлығын, оның қайталанбас сұлулығы мен нәзіктігін, жергілікті мәдениеті мен дәстүрлерін таныстыруды мақсат еткен. Сол себепті еліміздің балалар әдебиетінде өзіндік қолтаңбасы қалыптасып үлгерген жас жазушылардың қызықты хикаяттарға толы әңгімелері мен заманауи ертегілері бір жинақта ұсынылған. Әрбір шығарманың сюжеті балаларды өзіне елітіп, атамекеніміздің әртарапына саяхат жасауға, туған жердің сыры мен жырын, тылсым құпиясы мен тарихын тануға, білуге жетелейді. Бұл – жаңа кітаптың үшінші ерекшелігі.
Қуыршақ театрында өткен таныстырылымға Толымбек Әбдірайым, Зәуре Төрехан, Серікбол Хасан сияқты балалар жазушылары мен ақындары, Дархан Мыңбай, Айгүл Мүкей және басқа да қоғам қайраткерлері мен медиа-тұлғалар, журналистер мен блогерлер, сондай-ақ жоба авторлары, «Шеврон» компаниясының өкілдері қатысты. Авторлар жоба тарихы мен оны жүзеге асыру барысы туралы айтып, әріптестерінің сауалдарына жауап берді.
«Қазақстандықтардың сапалы білім алу, денсаулық сақтау мүмкіндіктерін кеңейтіп, кәсіпкерлік пен инновацияға жағдай жасау біздің бір мақсатымыз. Бүгін серіктестерімізбен бірге ұсынып отырған кітабымыз балалардың оқуға құштарлығын арттырады, қоршаған ортаға қызығушылық оятады, ізденімпаз болып өсуіне жағымды ықпалын тигізеді деп сенеміз. Бұл мемлекет болашағы үшін өте маңызды», – деп қорытындылады «Шеврон» компаниясының еуразиялық бөлімшесінің корпоративтік байланыстар жөніндегі директоры Еркін Зікібаев.
К.ЕСІМ