Кеште жастар ақынның, сондай-ақ өз өлендерін оқып, ән шырқады. Мерейтой иесін Қарағанды облысы әкімдігі Ішкі саясат басқармасының басшысы Нұрлан Бикенов, облыс әкімдігі Мәдениет, архивтер және құжаттама басқармасы басшысының орынбасары Ерлан Нелдібаев, Қарағанды қаласы әкімдігі ішкі саясат бөлімінің басшысы Нұржан Ілияшев және «AMANAT» партиясының, Е.Бөкетов атындағы Қарағанды университетінің өкілдері арнайы құттықтап келді.
Нұрлан Бикенов «Сары тентектің» ұлт руханиятына қосқан үлесі қомақты екенін тілге тиек етті.
«Жұрт сізді ақын, айтыскер, қоғам қайраткері, қоғам белсендісі ретінде жақсы біледі. Бұған дейін атқарған жұмыстарыңызды үлкендер жарыса айтып жатыр. Оның бәрі жастарға көрсетіп жатқан өнегеңіз деп білемін. Соңыңыздан ерген шәкірттеріңізге, бауырларыңызға жол көрсетіп, ақыл-кеңес беріп келесіз», – деді басқарма басшысы.
Осынау кешті Жайық Бектұров атындағы облыстық жасөспірімдер кітапханасында өткізілуінің өзіндік себебі бар. Бұл жайында мерейтой иесінің өзі әңгімелеп берді.
«Жас кезімнен қасымда ақылшым, рухани ұстазым болған Жайық Бектұров еді. Ол – қазақтың асылдарын, Алаштың ардақтыларының көзін көрген тұлға. Маған Ахметтің, Мағжанның, Әлиханның кім екенін, олардың бүкіл еңбегін таныстырған сол кісі еді. Ол уақытта Алаш арыстары жайлы еш жерде айтылмайтын. Сол кісінің аты берілген кітапханада аруағына тағзым етіп, бір жақсы шара өткізсем деп едім. Бүгін мерейлі сәт туыпты. Мақсатым өнерімді насихаттау емес, Қазақстанды нығайтып, елдің жақсыларын дәріптеу», – деді Қ.Мақсұтов.
Ә.ЖҰМАНОВ,
Қарағанды облысы