Жиынды ашқан кеңес жетекшісі Динара Зәкиева құрамның жаңарғанын атап өтті. Әлеуметтік сала сарапшылары, Үкіметтің және аймақтағы органдардың өкілдері, Мәжіліс депутаттары мүшелігіне өткен кеңес партияның сайлауалды бағдарламасын іске асыруға қоғамдық бақылау жүргізеді.
«Кеңес «AMANAT» партиясының сайлауалды бағдарламасының әлеуметтік қамту бағыттарының тиімді іске асырылуын талдау және бақылаумен айналысады. Әлеуметтік маңызы бар мәселелер, заң жобалары бойынша отырыстар өткізетін боламыз. Биыл бізде 4 отырыс өткізу жоспарланған», – деді Динара Зәкиева.
Кеңес ресми отырыстардан бөлек, қоғамдағы өзекті мәселелерге, резонансты жағдайларға қатысты кездесулер өткізеді. Басқосуға мемлекеттік орган өкілдері шақырылады.
Бұл жолы отырыстың күн тәртібіне тұрғын үй қолжетімділігі мәселесі талқыланды. Мәжілісте «Қазақстан Республикасының тұрғын үй саясатын реформалау мәселелері жөніндегі кейбір заңнамалық актілерге өзгертулер мен толықтырулар енгізу туралы» заң жобасы қаралып жатыр. Жиында кеңес мүшелері осы заң жобасына ұсыныстар берді.
Сондықтан кеңес отырысына Индустрия және инфрақұрылымдық даму министрлігі Құрылыс және тұрғын үй-коммуналдық шаруашылық істері комитетінің төрағасы Тимур Қарағойшин, Оқу-ағарту министрлігінің Балалар құқықтарын қорғау комитеті төрағасының орынбасары Батырхан Жолдас, «Отбасы банкінің» басқарма төрайымы Ләззат Ибрагимова, сондай-ақ жергілікті атқарушы органдардың өкілдері, республикалық қоғамдық және өңірлік кеңестің мүшелері отбасы мен халықты әлеуметтік қорғау сарапшылары қатысты.
Мәжіліс депутаты Динара Зәкиева әлеуметтік осал топтарға жататын ерекше қажеттіліктері бар балалар отбасылары, толық емес және көпбалалы отбасылар, жетім балаларға ең өзекті мәселе – тұрғын үй мәселесі екенін атап өтті.
«Қазір елімізде 638 мың адам баспана кезегінде тұр. Оның ішінде 60 мың жетім бала бар. Аймақтарда жергілікті атқарушы органдар баспана беруде осы санаттағы 20 пайыздық квотаны сақтамайды. 2021 жылы жетім балаларға 1 211 пәтер берілді. Ол тек қана 13 пайызды қамтиды. Ерекше қажеттіліктері бар балалардың отбасыларына қолданыстағы бағдарламалар қолжетімді емес. Олардың жағдайлары бағдарлама талаптарына сәйкес келмейді. Әлеуметтік осал топтарға арнай бағдарламаларды, олардың тұрғын үй мәселелерін шешетін арнайы тетіктер енгізу керек деп ойлаймыз», – деді Динара Зәкиева.
ИИДМ комитет төрағасы Тимур Қарағойшин баяндама жасап, әлеуметтік топтарды тұрғын үймен қамтамасыз ету саласындағы мәліметтермен бөлісті. Ол мемлекеттік бағдарламалармен берілген пәтерлерге қатысты ақпараттарды ұсынды.
Жиында баспана кезегінде тұрған көпбалалы ана Сәбира Есмаханова жалғызбасты аналарға пәтер алу мәселесінде қиыншылықтар бар екенін атап өтті. Ал Мария Галиева жетім балалардың баспаналы болуы жөнінде мәселе көтерді. «Мен кезегім қазір 1 200-інші. Тоғыз жылдан бері кезекте тұрмын. Мен пәтер алу үшін тағы он жыл кезекте тұруым керек пе?» – деп сұрады ол.
«Отбасы банкінің» басқарма төрайымы Ләззат Ибрагимова жыл сайын жоспарланған 25 мың әлеуметтік пәтердің жартысын несиеге, жартысын жалға берілетін пәтер ретінде қарастыру үлкен жетістік болатынын атап өтті. Алайда кезекте тұрғандардың барлығын сұранысын қазіргі бюджет бөлінісі бойынша шешу мүмкін емес екен. Оның айтуынша, «Отбасы» банкі мемлекеттік бағдарламалардың барлығында әлеуметтік 4 санатқа басымдық берген. Соның өзінде ғана осы топтар бойынша 200 мыңдай адам тізімге алынған.
Ж.АМАНГЕЛДІ
Елдар ҚАБА (коллаж)