Мектеп оқушыларының бос уақытын тиімді өткізуден бөлек, жеткіншектердің өзара байланысын нығайтып, ынтымақтастығын арттыратын бұл жобаны Шымкент қаласының әкімі Мұрат Әйтенов ұсынған. Салауатты өмір салтын ұстануға баулитын бұл жоба мегаполистердегі барлық мектепті қамтуы керек болған. Ұсыныс 2021 жылдан бері сәтті жүзеге асып, сайыс мектеп оқушыларының, мұғалімдер мен ата-аналардың үлкен қолдауына ие болып отыр.
Қала мектептері арасында жаңа оқу жылы басталғаннан жыл бойы жүргізілетін сайыс спорттың футбол, баскетбол, волейбол, шахмат түрлерінен өтеді.
«Лига біркүндік жарыс емес. Бір мектептің оқушылары спорттың 4 түрінен жасақталып, аудандық топты жасақтайды. Топтарға бөлінген 12 команда өзара ойнап, іріктеледі. Бірінші, екінші, үшінші орын алған командалар финалға жіберіледі. Әр аудан 4 топқа бөлініп, 8 команда жасақталады. Демек, әр ауданның 8 мықты командасының қарсыласы жеребе арқылы анықталады. Бұл сайыстың ерекшелігі де сол балаларды бір-біріне жақындатады, достастырады. Команда мүшелері ауызбіршілікті, еліне деген сүйіспеншілікті терең сезінеді. «Бәріміз – біріміз, біріміз – бәріміз үшін» деген ұранды ұстанады», – дейді қалалық Денешынықтыру және спорт басқармасының бөлім басшысы Мақсат Орымбаев.
Жеткіншектер бірнеше сыннан сүрінбей өтіп, ақтық сынға жетеді. Жеңілген командалар жарыс жолынан шығып қалады да, бабы мен бағы қатар шапқандар жеңіске жақындай түспек.
«Дәстүрлі түрде өтіп келе жатқан сайысқа балалардың қызығушылығы жоғары. Мысалы, былтыр жеңілген команда биыл өте жоғары деңгейдегі ойын өрнегін көрсетіп, жүлдеге ие болды. Олардың ерекше дайындалғаны көрініп тұрды. Біз жарыс барысында балалардың жанында, басы-қасында боламыз. Олардың жеңіске деген талпынысын, сөзбен жеткізе алмайтын әсерін, ұтылып бара жатса әттеген-ай дейтін сәттерін көріп, сезінеміз», – дейді бөлім басшысы.
«Шымкент жастар лигасы» негізінен командалық ойындардан құрылған. Сол себепті жеңген команда, яғни жеңіс тұрғырынан көрінген мектепке демеушілер есебінен 20 миллион теңгенің ұтысы белгіленген. Былтыр және биыл ұтқан командаларға мектепке балаларды тасымалға қажетті автобустар сыйға берілді. Ал қалған қатысушылардың барлығына бірдей кубок пен медальдар және диплом табыс етілді.
Биыл да балалардың құқын қорғау күні үш жыл қатарынан дәстүрлі түрде ұйымдастырылып келе жатқан «Шымкент жастар лигасы» жобасының ІІІ кезеңі өз мәресіне жетті. Финалдық ойындар қайта жаңғырып, реконструкцияланған «Металлург» стадионында өтті. Шымкенттің талай жылдық тарихына куә болған бұл стадионда жастардың спортпен алаңсыз айналысуына барлық қолайлы жағдайлар жасалыпты.
«Шымкент жастар лигасы» жобасында футбол, баскетбол, волейбол, шахмат түрлерінен 151 жалпы орта білім беру мектебінен 500-ден астам команда жасақталып, 6 мыңға жуық оқушы қатысты. Демек, осынша баланың белсенді қатысуы лиганың бұқаралық сипат алғанының көрінісі болса керек.
Шахматтан – Ө.Жолдасбеков атындағы №9 ІТ лицейінің, волейболдан – А.Байтұрсынов атындағы №50 мектеп-гимназиясының, баскетболдан – М.Х.Дулати атындағы №8 гимназияның, ал футболдан – Т.Тәжібаев атындағы №47 мектеп-гимназиясының командалары лиганың чемпионы атанды. Әр спорт түрі бойынша чемпион командаларға демеушілердің қолдауымен алынған 20 миллион теңгенің 4 шағын автобусы табысталды.
Айта кетейік, шахматтан былтыр да, биыл да Ө.Жолдасбеков атындағы лицейдің балалары алдарына қара салдырмай қатарынан екі жыл автобусқа ие болды.
«Былтыр жеңімпаз болғандар биыл қатыспауы тиіс деген талап жоқ. Баланың бағын байламауымыз керек. Ынтасы бары қатысып, өз мықтылығын көрсете алады. Өзге мектептердің мұғалімдері де жеңіске жету үшін барын салғаны абзал. Біз балалардың бетінен қақпауымыз керек. Бізді жастардың белсенділігі қуантады. Мәселен, биыл футболға 135 мектеп, баскетболға 137, волейболға 129 және шахмат ойынына қатысуға 132 білім ұясының оқушылары ниет білдіріп, өтініш тастады. Спортпен тұрақты түрде айналысып жүрген баланың әлеуеті де зор болады», – деп атап өтті Мақсат Мұсаханұлы.
Жеткіншектердің өзі де «Шымкент жастар лигасының» мыңнан тұлпар, жүзден жүйріктерге жол ашатын жоба екенін алға тартады. Сондықтан олардың бұл байқауға дайындығы ерекше.
«Әрине қай сайыста да жеңіске жету оңай емес. Дегенмен біздің команда бұл лигаға жан-жақты дайындалып, топ жарды. Қуанышымызда шек жоқ. Еңбегіміз ақталды. Бізге сенім білдірген бапкерімізге, ұстаздарымызға, ата-аналарымызға алғыс айтқым келеді», – дейді Т.Тәжібаев атындағы №47 мектеп-гимназиясының оқушысы Балжан Нұран.
Министрлік жиынында «Шымкент жастар лигасы» өзге өңірлерге үлгі ретінде көрсетіліп, жоғары баға берілді. Келешекте бұл жоба еліміздің өзге аймақтарында да жалғасын табуы мүмкін.
Назгүл НАЗАРБЕК,
Шымкент қаласы