Алдағы кезде алыстағы Алакөлге дейін газ магистралды тартылатын болды.
Күні кеше Республика күні мерекесіне дайындалып жатқан екі ауылдың тұрғындары табиғи отынға қосылып, қуанышқа кенелді.
Табиғи газға Қаратал ауданының 2 300-ден астам тұрғыны қол жеткізді. Облыс әкімінің орынбасары Әсет Қанағатов ауыл тұрғындарын қуаныштарымен құттықтап, мерейлі мерекеге орай тілегін білдірді.
Жалпы, Қаратал ауданында 35 елді мекеннің 19-ы газдандыруға жатады. 2019 жылы «Үштөбе» автоматтандырылған газ тарату станциясы және құны 3,1 млрд теңге болатын ұзындығы 44,7 шақырым газ құбыры пайдалануға берілді. Қазір ауданның 10 елді мекенінде құрылыс-құрастыру жұмыстары жүргізілуде. Елді мекендер кезек-кезегімен көгілдір отынға қосылуда. Күні кеше көптен күткен газ 530 түтіні бар, яғни 1 800 адам тұратын Кәлпе ауылы мен 530 тұрғыны бар Оян ауылына берілді.
– Қыс бойы 5-6 тоннаға дейін көмір жағатынбыз. Бұл қарапайым отбасының қалтасына едәуір салмақ түсіреді. Үйге көмір, отын тасуың керек, от жағасың, күл шығару да оңай емес. Енді міне, үйге газ кіргізіп, осы әурешіліктің бәрінен арылып, қуанып отырмыз, – дейді газға алғашқылардың бірі болып қосылған Кәлпе ауылында тұратын Қайрат Сәрсенбаевтың шаңырағындағы отанасы Қарлығаш Өскенбаева.
Ауыл тұрғыны Рая Тілеубаеваның айтуына қарағанда, оның отбасы Кәлпе ауылында 40 жылдан бері тұрады. Осы күнге дейін көмір жағып келіпті. Шалғайдағы ауылға аудан орталығынан көмір әкелу де оңай емес. Бір қыста 7 тонна жағады екен. Көмір де жыл сайын қымбаттап, қалтаға қосымша салмақ салатын болған. Енді соның бәрінен құтылып, табиғи отынның қызығын көретін жағдайға жеткендеріне қуанышты екендігін білдірді.
Кәлпеге газ желілерін тарту жұмыстарын 2021 жылдан бері Gas Energy Construction ЖШС жүргізген, оған 500,2 млнтеңге бөлініп, 27,1 шақырым газ құбыры орнатылыпты. Осы елді мекенмен қатар Оян ауылының тұрғындарына да газ берілді. Бұл ауылды газдандыруға 86,9 млн теңге бөлініп, 7,3 шақырым газ желілері тартылған. Мұндағы газдандыру жұмыстарын да «Gas Energy Construction» ЖШС жүргізіпті.
Облыстық энергетика және ТҮКШ басқармасының хабарлауынша, Қаратал ауданын газдандыру одан әрі жалғасады. Қазір Қанабек ауылын көгілдір отынға қосу-реттеу жұмыстары атқарылуда, ал жыл соңына дейін ауданның тағы 8 ауылын, яғни жалпы сомасы 2,9 млрд теңгеге Жаңаталап, Ескелді би, Көкдала, Қызылжар, Достық, Тастөбе, Ортатөбе, Бастөбе ауылдарын кезең-кезеңімен газдандыру жоспарланып отыр. Сондай-ақ өткен жылдан бастап Үштөбе қаласында құны 7 млрд теңге болатын газ тарату желілерінің құрылысы жүргізілуде. Бүгінде жобаға сәйкес жоспарланған 148 шақырымның 134 шықырым газ тарату желісі салынды, яғни жұмыстар 90,5% -ға орындалды. Газбен жабдықтау биылға жоспарланған.
Болат АБАҒАН,
Жетісу облысы