Суретші Аймұрат Таңатовтың айтуынша, мемлекеттік гранттың қолдауымен 2023 жылдың мамыр-шілде аралығында «Ақтау қалалық Суретшілер одағы» қоғамдық бірлестігі мен Маңғыстау облысының мәдениет, мұрағаттар және құжаттама басқармасы бірлесе «Отпантау-Ұлытау» атты экспедиция ұйымдастырды.
Аты аталған экспедиция аясында қылқалам шеберлерінің шығармаларын кең ауқымда танымал ету мақсатында арнайы іріктеу жүргізілді. Сонымен қатар Астанада «Күзгі вернисаж» атты әр өңірден келген суретшілер жұмыстарының көрмесі ұйымдастырылды, онда «Отпантау-Ұлытау» суретшілер экспедициясының жұмысы қорытындыланды.
Аймұрат Таңатов биыл шілдеде маңғыстаулық суретшілер Атырау, Батыс Қазақстан, Қызылорда және Түркістан облыстарына сапарлап, киелі орындарды аралап, шеберлік сыныптарын өткізгенін атап өтті.
– Экспедиция Қорқыт ата – Қожа Ахмет Ясауи кешені – Отпантау – Сарайшық – Бөкей орда бағыттарын қамтыды. Экспедиция барысында өңір суретшілері осы тарихи орындарда пленэр ұйымдастырды, – деді суретші Аймұрат Таңатов.
Сағындық РЗАХМЕТОВ,
Маңғыстау облысы