Ол да ата мен әженің баласы. Аралас жекпе-жекке келуіне ауылдағы күрес пен бокс үйірмесіне қатысуы әсер еткен. Қанша рет кездесу өткізсе де, отбасын сегізбұрыштың жанына жолатпаған. Өйткені ата-анасының үйде отырып тілеуін тілегенін жөн көреді. Асу – аралас жекпе-жек спортындағы қазақ файтерлерінің арасында орны бар спортшы. М-1 Globalтұжырымының уақытша чемпионы саналатын Зұлфықардан (лақап аты) алдағы жоспары жайлы сұрадық.– Асу, Крис Келадеспен өткен жекпе-жектен кейін тыныштық орнаған сияқты. Мұның сыры неде?
– Астанада өткен турнирде белбеуді ұтып алған соң M-1 Global турнирі әлі өте қойған жоқ. Биыл ақпанға жоспарланған үлкен дода бар еді, оны да кейінге қалдырды. Оған себеп, дүниені дүр сілкіндірген коронавирустың таралуы болып отыр. Ұйымдағылардың айтуына қарағанда, көктемде өтетін сияқты.
– Айтыла-айтыла жауыр болған сұрақ, Александр Доскальчукпен қашан кездесесің? Жалпы бұл өзі мүмкін нәрсе ме?
– Мұның жыры бітпей тұр. Негізі, бұл сұрақты маған емес, Доскальчукке қою керек. Маған ол маңызды емес, Александр шықпаса, басқа да файтерлер бар, кез келгенімен төбелесуге әзірмін. Қарсылас таңдамаймын.
– Бірақ негізгі белбеу соның белінде жүр емес пе?
– Ол бұлай жалтара беретін болса, белбеуінен айырылады.
– Басқа тұжырымға ауысу жағын ойластырдың ба?
– Әрине. Оны ойлап жүрміз, бірақ әзірге M-1 ұйымымен келісімшартымда көрсетілгендей, әлі 3-4 кездесу өткізуге тиіспін. Осыны нәтижелі түрде аяқтасам, белбеуге толыққанды ие болсам, UFC тұжырымының есігін қағуға болады.
– Биылғы жылдың соңына дейін UFC ұйымдастыратын турнирлерге үлгересің бе?
– Аяқ астынан қазіргі M-1 белбеуіне ие болдым, бәлкім құдай бұйырып жатса, бұл да болар деп ойлаймын. Әрине, «генерал болуды армандамаған солдат солдат емес». UFC тұжырымында жұдырықтасу кез келгеннің арманы шығар. Менің де шыққым келеді.
– 2019 жылы ұйым чемпионы боламын деп ойладың ба?
– Басқа адаммен шығуым керек еді. Арман Әшімов жарақаттанып қалған соң соның орнына шығуға тура келді. Өмірде барлық нәрсе Алланың қалауымен болады. Ең бастысы, бұған дайын едім, жекпе-жекті жақсы өткіздім.
– Арман Әшімов Асу Алмабаевтан кейін чемпион атана ала ма, қалай ойлайсың?
– Енді ол Арманның өзіне байланысты. Арман ба, басқа ма, менің ойымша, аралас жекпе-жекте жүрген қазақ жігіттерінің кез келгені чемпион болуға лайық.
– Салмақ дәрежесін ауыстыру ойда бар ма?
– Жоқ, менің салмағым – 61 келі, ал салмақ ауыстыратын болсам, онда 70 келі тартуым керек. Бірден он келі қоса алмаймын. Маған ыңғайлысы 57 келі болып тұр.
– Аралас жекпе-жек спортында қай файтердің жекпе-жек өткізу стилі ұнайды, қайсысы жаныңа жақын?
– Пір тұтып жүрген ешкімім жоқ, тек бірнеше спортшының жақсы жақтарын алуға тырысамын. Мәселен, Джордж Сент-Пьердің жан-жақтылығы ұнайды, ресейлік Петр Ян да өте мықты, Хабибтің күресі жақсы деп айтуға болады.
– Алдағы жоспарларыңмен бөліссең...
– Осы айдың соңына қарай Шымкентте Комбат жиу-житсудан Қазақстан чемпионаты өтеді. Соған дайындық басталды. Әзірше әуесқойлар арасындағы жарыстарға қатыса беремін. Дәл осы спорт түрінен Азия, әлем чемпионаттарына қатысу да ойда бар. Себебі спорттық бабымды жоғалтып алмауым керек. Кәсіпқой деңгейдегі жекпе-жектер болып жатса, оған да қатыса беремін.
– Әңгімеңізге рақмет!Сұхбаттасқан Айзат АЙДАРҚЫЗЫ
